სამართალი

განაჩენის გაანალიზების შედეგად მივიღებთ გადაწყვეტილებას უზენაეს სასმართლოში გასაჩივრების შესახებ - ე.წ კორტების საქმის პროკურორი

ე.წ კორტების საქმის პროკურორის ამირან გულუაშვილის განცხადებით, სააპელაციო სასამართლოს განაჩენის გაანალიზების შემდეგ, ბრალდების მხარე მიიღებს გადაწყვეტილებას, უზენაეს სასამართლოში გასაჩივრების შესახებ.

ამის შესახებ გულუაშვილმა, სააპელაციო სასამართლოს მიერ ე.წ კორტების საქმეზე მიღებული გადაწყვეტილების კომენტირებისას განაცხადა.

„სააპელაციო სასამართლოში, როგორც განაჩენიდან ირკვევა, არ იქნა გაზიარებული ჩვენს მიერ წარმოდგენილი არგუმენტები. ბუნებრივია, დღევანდელ სასამართლო სხდომაზე, მოსამართლე ზეპირ დასაბუთებას არ ახდენს, გადაწყვეტილების მხოლოდ სარეზოლუციო ნაწილი იქნა გამოცხადებული, შესაბამისად, ჩვენთვის უცნობია, თუ რა შეფასებებზე და არგუმენტებზე დაყრდნობით არ გაიზიარა სასამართლომ ჩვენი პოზიცია, გამამართლებელი განაჩენის შეცვლის ნაწილში. განაჩენის გაანალიზების შედეგად, მივიღებთ გადაწყვეტილებას, უზენაეს სასმართლოში გასაჩივრების შესახებ“,- განაცხადა ამირან გულუაშვილმა.

თბილისის სააპელაციო სასამართლომ, გიორგი ცააძისა და ირაკლი ფირცხალავას, კორტების მიმდებარე ტერიტორიაზე 2006 წელს ზურაბ ვაზაგაშვილისა და ალექსანდრე ხუბულოვის განზრახ მკვლელობის ბრალდებით, პირველი ინსტანციის სასამართლოს მიერ გამოტანილი განაჩენი 12-12 წლიანი პატიმრობის შესახებ, ძალაში დატოვა.

ბრალდებულების ადვოკატები სააპელაციო სასამართლოს გადაწყვეტილებას ევროპის სასამართლოში გაასაჩივრებენ, რადგან უზენაესი სასამართლოს იმედი არ აქვთ.

მონიკა დავლიანიძე