პოლიტიკა

გამსხვილდეს მაჟორიტარული ოლქები და გადავიდეთ სამმანდატიან მაჟორიტარულ ოლქებზე - „ევროპული საქართველო“ ახალი ინიციატივით გამოდის

„ევროპული საქართველოს“ ერთ-ერთი ლიდერი დავით ბაქრაძე ინიციატივით გამოვიდა. ახალი შემოთავაზება ითვალისწინებს მაჟორიტარული ოლქების გამსხვილებასა და სამმანდატიან მაჟორიტარულ ოლქებზე გადასვლას.

ბაქრაძის განმარტებით, არსებული საარჩევნო სისტემა ხალხის განწყობას არ ასახავს. ვითარების შესაცვლელად ბაქრაძემ შესთავაზა მაჟორიტარული მანდატების 1/3-ის მიცემას პირველ ადგილზე გასული პარტიისთვის, 1/3-ის - ოპოზიციისთვის, ხოლო დანარჩენი მესამედის განაწილებას შეთანხმებული ფორმულის მიხედვით.

„ქართულმა ოცნებამ“ საკონსტიტუციო ცვლილებებთან დაკავშირების დროს უარი განაცხადა 2020 წლის არჩევნებისთვის საარჩევნო სისტემის შეცვლაზე და დარჩა სისტემა, რომელიც თავისი შინაარსით არის სრულიად უსამართლო. დღევანდელ სისტემაში პირველ ადგილზე გასულ პარტიას მიაქვს ყველა მაჟორიტარის ხმა. სწორედ ამის შედეგია მაგალითად ის, რომ 2016 წელს საპარლამენტო არჩევნებზე „ქართულმა ოცნებამ“ მიიღო ხმების 48%, მაგრამ პარლამენტში აქვს მანდატების 78%.

არსებული სისტემა ხალხის განწყობას ვერ ასახავს. ჩვენ გამოვდივართ შემდეგი ცვლილების ინიციატივით - გამსხვილდეს მაჟორიტარული ოლქები და გადავიდეთ ერთმანდატიანის ნაცვლად, სამმანდატიან მაჟორიტარულ ოლქებზე. ეს ნიშნავს, რომ პირველ ადგილზე გასულ პარტიას ექნება მაჟორიტარული მანდატების 1/3, მაჟორიტარული მანდატების 1/3-ს ავტომატურად წაიღებს ოპოზიცია და მეორე ადგილზე გასული პარტია, ხოლო დარჩენილი 1/3 გადანაწილდება შეთანხმებული ფორმულის მიხედვით“, -თქვა ბარქაძემ და განმარტა, რომ შეთავაზებული სისტემით „ერთი პარტიის მხრიდან არ მოხდება ყველა მანდატის ჯიბეში ჩადება“.

დეპუტატის თქმით, ეს ინიციატივა არ საჭიროებს საკონსტიტუციო ცვლილებას, არამედ უნდა შევიდეს საარჩევნო კოდექსში. ბაქრაძემ თქვა, რომ ამ ინიციატივის გასატარებლად მმართველი გუნდის პოლიტიკური ნებაა საჭირო.