პოლიტიკა

გამომდინარე იქიდან, რომ სიმართლე ყველასთვის ცხადი გახდა, ბუნებრივია, ეს სპექტაკლი ჩავარდა - ირაკლი კობახიძე „ომეგა ჯგუფის“ საქმეზე

პარლამენტის თავმჯდომარემ ირაკლი კობახიძემ რუსთავი 2-ის კრიტიკისას ბოლო დროს გახმაურებული ორი საქმე გაიხსენა - „ომეგა ჯგუფის“ საკითხი და სავარაუდოდ, მირზა სუბელიანთან დაკავშირებული აუდიოჩანაწერები. ორივე მათგანი კობახიძემ „რუსთავი 2“-ის მიერ დადგმული სპექტაკლები უწოდა.

„შეგახსენებთ ორ ძირითად საქმეს, რომლებზეც არსებითად იყო აგებული ბოლო დროს რუსთავი 2-ის „ბრეინვოშინგი“ , ანუ ტვინის გამორეცხვა. ერთი იყო „ომეგას“ საქმე, ანუ პირველი სპექტაკლი, რომელიც შემოგვთავაზა ჩვენ რუსთავი 2-მა და დასრულდა სხვადასხვა მონაცემით, მათ შორის ექსპერტიზის მონაცემებით, რომ ეს იყო სპექტაკლი და ეს სპექტაკლი ძალიან მალევე ჩავარდა, როგორც კი საზოგადოებისთვის გახდა ცნობილი სიმართლე. და საბოლოოდ გაირკვა ის, რომ ერთ კონკრეტულ ადამიანს სურდა ათეულობით მილიონის არგადახდა, გადახდაზე უარის თქმა ბიუჯეტში. ესაა ხალხის ფული, რომელიც აუცილებლად უნდა იყოს გადახდილი. და მან მოკავშირეებად გაიხადა ნაციონალური მოძრაობა და მისი პარტიული ტელევიზია რუსთავი 2. გამომდინარე იქიდან, რომ სიმართლე ყველასთვის ცხადი გახდა, ბუნებრივია, ეს სპექტაკლი ჩავარდა.

ახლა დაიწყო მეორე სპექტაკლი, რომელსაც ისევე გაეცემა ზუსტად პასუხები, როგორც გაეცა პირველი სპექტაკლის ფარგლებში დასმულ შეკითხვებს“, - განაცხადა კობახიძემ ბრიფინგზე.

კობახიძის მტკიცებით, რუსთავი 2 მუშაობს რუსული სტილით და ტვინის გამორეცხვის პოლიტიკას აწარმოებს. სწორედ ამის მაგალითად მოიყვანა მან „ომეგა ჯგუფის“ საქმე.