პოლიტიკა

გამოკითხულთა 92% მიიჩნევს, რომ არჩევნებმა მშვიდად და მოწესრიგებულად ჩაიარა - ლორა თორნტონი

,,ეროვნულ-დემოკრატიული ინსტიტუტის’’ კვლევის თანახმად, მოსახლეობის 92% მიიჩნევს, რომ არჩევნებმა მშვიდად და მოწესრიგებულად ჩაიარა.

როგორც NDI კვლევის მეორე, პოლიტიკურ ნაწილის პრეზენტაციის შემდეგ ჟურნალისტებს NDI-ის საქართველოს ოფისის დირექტორმა, ლორა თორნტონმა განაცხადა, კვლევის თანახმად, მოსახლეობამ გადაწყვეტილება იმის შესახებ, თუ ვის მისცემდა ხმას, არჩევნებამდე მიიღო.

„მთავარი მესიჯი, რომელიც გამოიკვეთა კვლევაში არის ის, რომ მოსახლეობის უმეტესობა, 92% მიიჩნევს, რომ არჩევნებმა მშვიდად და მოწესრიგებულად ჩაიარა. გამოიკვეთა ის ფაქტი, რომ მოსახლეობის უმეტესობამ მონაწილეობის საკითხი და ვის მისცემდა ხმას, არჩევნებამდე გადაწყვიტა. ამომრჩეველს ეს მიაჩნდა თავის მოქალაქეობრივ მოვალეობად, რაც ძალიან საინტერესოა, რადგან სხვა ქვეყნებში არჩევნებზე მიდიან პარტიების და მათი იდეოლოგიის მხარდასაჭერად’’, - განაცხადა თორნტონმა.

რაც შეეხება პარტიებისადმი ნდობას, თორნტონის თქმით, გასული წლის მარტთან შედარებით მოსახლეობა უფრო ოპტიმისტურად არის განწყობილი, თუმცა აღსანიშნავია, რომ ქართული ოცნების მხარდამჭერების პარლამენტისადმი ნდობა, უფრო მაღალია ვიდრე სხვა პარტიების მხარდამჭერებისა.
,,რაც შეეხება პარტიებისადმი ნდობას, ამ შემთხვევაში 2016 წლის მარტთან შედარებით, მოსახლეობა უფრო ოპტიმისტურად არის განწყობილი, თუმცა როგორც გაირკვა ,,ქართული ოცნების’’ მომხრეებს უფრო მეტი ნდობა აქვთ პარლამენტისადმი, ვიდრე სხვა პარტიების მხარდამჭერებს. მათში შეინიშნება პესიმისტური განწყობა, ამიტომ ჩემი აზრით, მთავარია პარლამენტის წევრები წარმოადგენდნენ არა მხოლოდ მათ ვინც მათ ხმა მისცა, არამედ მთლიანად მოსახლეობას,“-განაცხადა ლორა ტორნტონმა.

ნინო ექვთიმიშვილი