პოლიტიკა

გამოკითხულთა 65% საქართველოს ევროკავშირში გაწევრიანებას ემხრობა, ხოლო 21% ევრაზიულ კავშირში შესვლას ემხრობა - NDI

ეროვნულ-დემოკრატიული ინსტიტუტის (NDI) კვლევის თანახმად, გამოკითხული მოსახლეობის 65% საქართველოს ევროკავშირში გაწევრიანებას ემხრობა, ხოლო 21% - ევრაზიულ კავშირში.

ევროკავშირში გაწევრიანებას ყველაზე მეტად უჭერენ მხარს თბილისში - 76%, მას მოჰყვებიან დიდ და პატარა ქალაქებში გამოკითხული მოსახლეობა - 67-67%. სოფლებში ევროკავშირში გაწევრიანებას მხარს უჭერს გამოკითხულთა 66%, ხოლო ეთნიკურ უმცირესობათა დასახლებებში კი - 31%.

რაც შეეხება ევრაზიულ კავშირში გაწევრიანებას, ყველაზე მეტად ამას მხარს უჭერენ ეთნიკურ უმცირესობათა დასახლებებში გამოკითხულები (48%), პატარა ქალაქებში ეს მაჩვენებელი 23%-ს შეადგენს, სოფლებში - 22%-ს, დიდ ქალაქებში - 20%-ს, ხოლო თბილისში - 10%-ს.

2017 წლის დეკემბერში გამოქვეყნებული კვლევის შედეგებთან შედარებით საქართველოს ევრაზიულ კავშირში გაწევრიანების მომხრეთა რაოდენობა 8%-ით შემცირდა. ერვოკავშირში გაწევრიანების მომხრეთა რიცხვი კი 3%-ით გაიზარდა.

გამოკითხულთა 75%-სთვის მისაღებია მთავრობის მიზანი, გახდეს ევროკავშირის წევრი, ხოლო 15% -სთვის კი ეს სწრაფვა მიუღებელია.

კვლევის საველე სამუშაოები ჩატარდა 20 მარტი - 4 აპრილის პერიოდში, საქართველოს მასშტაბით (ოკუპირებული ტერიტორიების გამოკლებით), 2,194 პირისპირ ინტერვიუს წარმომადგელობითი შერჩევის საფუძველზე (გამოპასუხება 46%). კვლევა პირისპირ ინტერვიუს სახით ჩატარდა და მისი ცდომილება 2,2 პროცენტია.

კვლევა დიდი ბრიტანეთის მთავრობის UK aid-ის ფინანსური ხელშეწყობით ჩატარდა, საველე სამუშაოები კი CRRC-საქართველომ შეასრულა