პოლიტიკა

გამარჯვების შემთხვევაში ვადამდელ არჩევნებს დავნიშნავ - კახა კუკავა

,,თავისუფალი საქართველოს“ საპრეზიდენტო კანდიდატი, კახა კუკავა საპრეზიდენტო არჩევნებში გამარჯვების შემთხვევაში ვადამდელ საპარლამენტო არჩევნებთან დაკავშირებით რეფერენდუმის ჩატარებას გეგმავს.

,,ქართული პოლიტიკური სისტემა „ქართული ოცნების“, „ნაციონალური მოძრაობის“ და მათი სატელიტების მიერ სრულადაა მონოპოლიზირებული. ქართული საზოგადოება ითხოვს ახალ პოლიტიკურ ძალებს, რომლებიც არ იქნებიან ამ დაჭაობებული სისტემის ნაწილი.

შესაბამისად, ვპირდები საზოგადოებას, რომ „რეფერენდუმის შესახებ“ საქართველოს ორგანული კანონის მე-4 მუხლით გათვალისწინებული წესით, პრეზიდენტად არჩევის შემთხვევაში დავნიშნავ რეფერენდუმს შეკითხვით: „გსურთ თუ არა ვადამდელი საპარლამენტო არჩევნების ჩატარება“.

თუ მოსახლეობა მხარს დაუჭერს რეფერენდუმს, მივიღებთ ახალ მრავალპარტიულ პარლამენტს, სადაც არც „ოცნებას“ და არც „ნაციონალებს“ გადამწყვეტი როლი არ ექნებათ. თუ მოსახლეობა არ დაუჭერს მხარს ვადამდელი არჩევნების ჩატარებას, მე საკუთარი სურვილით გადავდგები პრეზიდენტის პოსტიდან“, - აცხადებს კახა კუკავა.