პოლიტიკა

გაეროს წამების წინააღმდეგ კომიტეტმა სთხოვა ქართულ მხარეს, თავი შეიკავოს მუსტაფა ემრე ჩაბუქის თურქეთისთვის გადაცემისგან - თეა წულუკიანი

იუსტიციის მინისტრის, თეა წულუკიანის ინფორმაციით, გაეროს წამების წინააღმდეგ კომიტეტმა შეატყობინა უწყებას, რომ ქართულმა მხარემ თავი შეიკავოს თურქეთისთვის დემირელის კოლეჯის მენეჯერის მუსტაფა ემრე ჩაბუკის გადაცემისგან მანამ, სანამ კომიტეტი არ მიიღებს გადაწყვეტილებას ამ საქმეზე.

„იუსტიციის სამინისტროში მოქმედებს სახელმწიფო წარმომადგენლობის სამსახური საერთაშორისო სასამართლოებსა და საერთაშორისო ადამიანის უფლებათა დაცვის ორგანოებში, როგორიც არის გაეროს წამების წინააღმდეგ კომიტეტი.

კომიტეტმა შეგვატყობინა, რომ მათ გამოსცეს გადაწყვეტილება, რომლითაც საქართველოს სახელმწიფოსა და მის სტრუქტურებს ეთხოვათ, მანამ სანამ თავად არ განიხილავენ თურქეთის მოქალაქის, მუსტაფა ემრე ჩაბუქის საქმეს, საქართველომ მისი თურქეთისთვის გადაცემისგან თავი შეიკავოს.

რაკი თბილისის საქალაქო სასამართლო იხილავს ამ საქმეს, გუშინ უკვე შევატყობინეთ იუსტიციის უმაღლეს საბჭოს ამ წერილის შესახებ და ასევე შევატყობინეთ საქართველოს მთავარი პროკურატურის საერთაშორისო ურთიერთობების დეპარტამენტს.

ამ ეტაპზე, სულ ეს არის და მინდა კიდევ ერთხელ ხაზი გავუსვა, რომ სასამართლო თავისივე დამოუკიდებლობის ფარგლებში, საქმის მასალებიდან გამომდინარე მიიღებს იმ გადაწყვეტილებას, რომელსაც ჩათვლის საჭიროდ“, – განაცხადა წულუკიანმა.

ანა მებურიშვილი