პოლიტიკა

გაეროს მივმართეთ და მათი არხებით მოხდა სხვადასხვა სახელმწიფოსთვის მოთხოვნის გაგზავნა - ზურაბ ალავიძე რუსეთის საგარეო უწყების განცხადებაზე

რეგიონული განვითარებისა და ინფრასტრუქტურის მინისტრი ზურაბ ალავიძე გამოეხმაურა რუსეთის საგარეო საქმეთა სამინისტროს ინფორმაციას, რომ ქართული მხარე ბორჯომის ხეობაში გაჩენილი ხანძრის ჩასაქრობად მოსკოვს დახმარება სთხოვა.

ალავიძის განცხადებით, რუსეთს მოთხოვნა არა უშუალოდ თბილისიდან, არამედ გაეროს მეშვეობით მიუვიდა.

„მე რამდენადაც ინფორმაცია მაქვს, გაეროს მეშვეობით, მათი არხებით მოხდა მიმართვა. გაეროს მივმართეთ და მათი არხებით მოხდა სხვადასხვა სახელმწიფოსთვის მოთხოვნის გაგზავნა. პროცედურულად ასეა. როგორც ვიცი, ამ არხით იყო ეს ყველაფერი მოგვარებული“, - თქვა ალავიძემ.

შეგახსენებთ, როგორც რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ განაცხადა, რუსეთის საგანგებო სიტუაციათა სამინისტრომ გამოჰყო ვერტმფრენი Ил-76 ბორჯომის ხეობაში ხანძრის ჩასაქრობად. მისივე ინფორმაციით, შემდგომ ქართულმა მხარემ უარი თქვა მათ დახმარებაზე იმ საბაბით, რომ ცეცხლის კერები ლოკალიზებულია და მოსკოვის დახმარების საჭიროება აღარ არსებობდა.

ზახაროვამ „ავადმყოფური ფანტაზიები“ უწოდა საქართველოში გაკეთებულ განცხადებებს რუსეთის შესაძლო მონაწილეობაზე ხანძრის განზრახ გაჩენაში.

ანა მებურიშვილი