პოლიტიკა

გადმოდი ქალების მხარეს - „ქალთა მოძრაობა“ პრეზიდენტის საპარლამენტო მდივნად დიმიტრი გაბუნიას დანიშვნას აპროტესტებს

„გადმოდი ქალების მხარეს“ - ამ ლოზუნგით „ქალთა მოძრაობის“ წევრებმა ათონელის საპრეზიდენტო რეზიდენციასთან პრეზიდენტის საპარლამენტო მდივნის თანამდებობაზე დიმიტრი გაბუნიას დანიშვნა გააპროტესტეს.

„ქალთა მოძრაობამ“ პრეზიდენტ სალომე ზურაბიშვილთან შეხვედრა მოითხოვა.

„ქალთა მოძრაობის“ დამფუძნებლის, ბაია პატარაიას განმარტებით, ისინი გაბუნიას მისი ადვოკატობის დროს გაკეთებული განცხადების გამო უპირისპირდებიან, რომლითაც მან, პატარაიას შეფასებით, სექსუალური ძალადობა ნორმად მიიჩნია. საქმე ეხება სექსუალურ შევიწროებაში ბრალდებული ზვიად დევდარიანის საქმეს, რომლის ინტერესებს დიმიტრი გაბუნია იცავდა.

„ჩვენ არ გვინდა, რომ რომელიმე მაღალ თანამდებობას იკავებდნენ ადამიანები, რომლებსაც სექსუალურ შევიწროებასთან ასეთი დამოკიდებულება აქვთ“, - განაცხადა პატარაიამ.

აქციის მონაწილეებმა ათონელის რეზიდენციასთან წითელი ლენტი დაამაგრეს წარწერით: "გადმოდი ქალების მხარეს".

თუ სალომე ზურაბიშვილი დღეს აქციის მონაწილეებს არ შეხვდება, „ქალთა მოძრაობის“ წევრები გეგმავენ, რომ პრეზიდენტის ადმინისტრაციას ოფიციალური წერილით მიმართონ და შეხვედრა მოითხოვონ.

ცნობისთვის, 2018 წლის დეკემბრის დასაწყისში „ქალთა მოძრაობისა“ და არასამთავრობო ორგანიზაციების ნაწილმა საქართველოს ახლად არჩეულ პრეზიდენტ სალომე ზურაბიშვილს მიმართა და მოუწოდა, პრეზიდენტის საპარლამენტო მდივნად დიმიტრი გაბუნიას კანდიდატურის განხილვის გადაწყვეტილებას გადახედოს.