სამართალი

გადავწყვიტე რომ მოვიხსნა ადვოკატები, მათი დახმარება სასამართლოში აღარ მჭირდება - ირაკლი ჩხვირკია

ბათუმში 11-12 მარტს განვითარებული მოვლენების ორგანიზებისა და ხელმძღვანელობის ბრალდებით დაკავებულმა ირაკლი ჩხვირკიამ ბათუმის საქალაქო სასამართლოს მიმართა საკუთარი ადვოკატების აცილების თაობაზე.

როგორც ჩხვირკიამ დღევანდელ სასამართლო სხდომაზე განმარტა, ის საკუთარ თავს დაიცავს და მას არ სჯერა სასამართლოს ობიექტურობის.

„გადავწყვიტე, რომ მოვიხსნა ადვოკატები. გთხოვთ, რომ სასამართლოდან გაათავისუფლოთ ისინი. მათი დახმარება სასამართლოში აღარ მჭირდება. ამას რამდენიმე მიზეზი აქვს. პირველი არის ის, რომ მე სასამართლოსგან ობიექტურ გადაწყვეტილებას არ ველოდები. ამ ქვეყანაში არანაირ ობიექტურობას არ ველოდები“, - თქვა ჩხვირკიამ.

თავად ადვოკატების მიმართ მას პრეტენზია არ გამოუთქვამს.

„ადვოკატების კვალიფიკაციაზე პრეტენზია არ მაქვს და არ მინდა, რომ მათ კარიერაში წაგებული საქმე იყოს“, -აღნიშნა ჩხვირკიამ.

ბათუმის საქალაქო სასამართლოში ბათუმის მოვლენებზე ირაკლი ჩხვირკიას და მერაბ ღოღობერიძის სასამართლოს პროცესი მიმდინარეობს.

ანა მებურიშვილი