პოლიტიკა

გადამწყვეტი მნიშვნელობა არ აქვს, ვინ შეხვდება პრეზიდენტს - მამუკა მდინარაძე

დღეს 16 საათზე პრეზიდენტის სასახლეში საქართველოს პრეზიდენტი გიორგი მარგველაშვილი ახლად მიღებულ კონსტიტუციაზე სალაპარაკოდ მმართველ გუნდს შეხვდება, თუმცა მას პარლამენტის თავმჯდომარე არ დაესწრება. ირაკლი კობახიძე ვენეციაში გაემგზავრა, სადაც ვენეციის კომისიის პლენარულ სხდომას დაესწრება.

ფრაქცია „ქართული ოცნების“ თავმჯდომარემ, მამუკა მდინარაძემ აღნიშნა, რომ გადამწყვეტი მნიშვენლობა არაა, მმართველი გუნდიდან ვინ წავა პრეზიდენტთან მოსალაპარაკებლად.

მდინარაძის თქმით, თუ პრეზიდენტი არ დაადებს ვეტოს ირაკლი კობახიძის მიერ შეთავაზებულ ორ საკითხს, ამას მოგვიანებით პარლამენტი გააკეთებს.

„ნამდვილად არ აქვს შემადგენლობას არსებითი და გადამწყვეტი მნიშვნელობა, მთავარია ის თემა, რომელიც კონსტიტუციას და იმ ორ საკითხს ეხება, რაც დაკავშირებულია ბონუსების სისტემისა და ბლოკების სისტემის გაუქმებასთან. ეს არის ორი საკითხი, რომელსაც ეთანხმებოდა აბსოლუტურად ყველა და რომელზეც საყოველთაო კონსენსუსი შედგა.

ახლა არის ჯერი პრეზიდენტზე. მას შეუძლია ვენეციის კომისიის რეკომენდაციების გათვალისწინებით, რომელთა გათვალისწინებაც მხოლოდ და მხოლოდ იმიტომ ვერ მოხერხდა, რომ ეს მოხდა მესამე მოსმენის წინ, მიიღოს გადაწყვეტილება და თავისი უფლებამოსილების ფარგლებში იმოქმედოს სწორად. შემდეგ ძალიან დაჩქარებულ რეჟიმში ეს საკითხებიც გავითვალისწინოთ და აისახოს კონსტიტუციაში. წინააღმდეგ შემთხვევაში, ჩვენ ნებისმიერ შემთხვევაში ვაპირებთ, რომ ეს ცვლილებები შევიტანოთ, ოღონდ ეს იქნება ოდნავ ხანგრძლივი პროცესი“, - განაცხადა მდინარაძემ.

შეგახსენებთ, კონსტიტუციის მიღების შემდეგ პარლამენტის თავმჯდომარემ, ირაკლი კობახიძემ შესთავაზა პრეზიდენტ გიორგი მარგველაშვილს, ვეტო დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას. მან აღნიშნა, რომ ამ საკითხზე სალაპარაკოდ მზადაა, ქვეყნის პირველ პირს შეხვდეს.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი