პოლიტიკა

ფულს მთავაზობდნენ, რომ უკრაინაში არ ჩამოვსულიყავი - მიხეილ სააკაშვილი

საქართველოს ყოფილი პრეზიდენტისა და ოდესის ყოფილი გუბერნატორის, მიხეილ სააკაშვილის მტკიცებით, პოლონეთში ყოფნისას მას ფული შესთავაზეს, რათა ის უკრაინაში არ დაბრუნებულიყო.

„ყველა გამოკითხვაში უკრაინელთა 90% ამბობს, რომ უკრაინაში უნდა შემოვეყვანე. ნუ თვლით თავის ხალხს სრულ იდიოტებად. რა შემოსევა? რა მასობრივი დარღვევები საზღვარზე? მასობრივი არეულობა? მასობრივად დაზარალებულები? ყველაფერი მარტივია: „ბარიგებს“, პრეზიდენტს არ სურთ, რომ უკრაინაში ვიყო. გამოიყვანეს ჯარი, ექსტრადირებით მემუქრებოდნენ, პრესკონფერენციებს მართავდნენ, პოლონეთის მთავრობას აწვებოდნენ, მიგზავნიდნენ სხვადასხვა პროგნოზს მესამე, მეოთხე პირებისგან. ფულს მთავაზობდნენ, რომ არ ჩამოვსულიყავი. მე კი ვთქვი, ბოდიში, მაგრამ უკრაინაში ჩავალ“, -აღნიშნა სააკაშვილმა.

შეგახსენებთ, 10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი