პოლიტიკა

ფრაქცია „ნაციონალურ მოძრაობას“ უკვე „ევროპული საქართველო“ჰქვია

ნაციონალური მოძრაობიდან წასული ე.წ ბოკერია-ბაქრაძის გუნდის წევრებმა ნაციონალური მოძრაობის ფრაქციას სახელწოდება შეუცვალეს.

ამიერიდან ფრაქციას „ევროპული საქართველო“ ჰქვია.

გარდა ამისა, მიღებული ცვლილებების მიხედვით, ყოფილ ფრაქცია „ნაციონალურ მოძრაობას“ ნიკა მელიას ნაცვლად, სერგო რატიანი უხელმძღვანელებს.

ამის შესახებ ინფორმაცია მედიას, ფრაქციის სხდომის დასრულების შემდეგ გიგი წერეთელმა გააცნო.

„ჩატარდა ფრაქციის სხდომა. დღის წესრიგში იყო რამდენიმე საკითხი, საორგანიზაციო საკითხები. პირველი, ეს არის ის, რომ ფრაქციას შეეცვალა სახელწოდება და მას „ევროპული საქართველო“ ეწოდა, შესაბამისად, შეიცვალა ფრაქციის ხელმძღვანელობა და ამ ფრაქციის თავმჯდომარედ არჩეულ იქნა სერგო რატიანი“,-აღნიშნა წერეთელმა.

რაც შეეხება ნაციონალური მოძრაობის კიდევ ერთ ფრაქციას „ნაციონალური მოძრაობა-საქართველოს წინსვლისთვის“, რომლის თავმჯდომარე ელენე ხოშტარიაა, ამ ფრაქციასაც შეეცვალა სახელწოდება და მას „ევროპული საქართველო - უკეთესი მომავლისთვის“ ეწოდა.

გარდა ამისა, ამ ფრაქციაში ირაკლი აბესაძე და თენგიზ გუნავა გადავიდნენ, რადგან ნაციონალური მოძრაობის გუშინდელი ოფიციალური გაყოფის შემდეგ, ფრაქცია რომან გოცირიძემ და სალომე სამადაშვილმა დატოვეს.

ფრაქციის არსებობისთვის კი 6 დეპუტატია საჭირო.

მონიკა დავლიანიძე