სამართალი

ფოთი რეგიონული თეატრების მე-4 საერთაშორისო ფესტივალს მასპინძლობს

დღეიდან , ფოთი რეგიონული თეატრების მე-4 საერთაშორისო ფესტივალს უმასპინძლებს. იმის გამო, რომ ვალერიან გუნიას სახელობის სახელმწიფო პროფესიული თეატრის შენობა ავარიულ მდგომარეობაშია, ფესტივალის გახსნის საზეიმო ცერემონია მალთაყვის სანაპიროზე გაიმართება. წარმოდგენები ქალაქის სხვადასხვა ლოკაციაზე და ქალაქგარეთ ჩატარდება.

თეატრის დირექტორის თენგიზ ხუხიას თქმით, ღონისძიების ფარგლებში უკრაინის, ირანის, ინგლისის, პოლონეთისა და საქართველოს რეგიონული თეატრების 16 სპექტაკლი იქნება წარმოდგენილი.

„ თეატრის ავარიული შენობის გამო, იძულებული გავხდით, სპექტაკლების მიხედვით, ქალაქის ტერიტორიაზე სხვადასხვა ლოკაცია შეგვერჩია. ბევრი სპექტაკლის ჩამოტანაზე უარი ვთქვით, რადგან შესაბამისი ინტერიერი არ არის. ასევე გვექნება გასვლა ქუთაისში, ბათუში, ოზურგეთში, ურეკში. ფესტივალი წელს იმითაც იქნება გამორჩეული, რომ უცხოელი სპეციალისტები მსახიობებს მასტერკლასებს ჩაუტარებენ“, -განაცხადა თენგიზ ხუხიამ.

ფოთის რეგიონული თეატრების ფესტივალი 2015 წელს დაფუძნდა. ღონისძიება კულტურულ-საგანმანათლებლო ფონდ „დღეს“ ორგანიზებით, საქართველოს განათლების, მეცნიერების, კულტურისა და სპორტის სამინისტროსა და ქალაქ ფოთის მუნიციპალიტეტის ფინანსური მხარდაჭერით ხორციელდება. ფესტივალი 30 ივლისს დაიხურება.

შეგახსენებთ, რომ ფოთის თეატრი 2014 წელს გაიხსნა. შენობა, რომლის მშენებლობაშიც 11 მილიონი ლარი დაიხარჯა, სარეაბილიტაციოა. 6 თებერვალს თეატრის ფოიეში ჭერის ნაწილი ჩამოინგრა. შემთხვევა გვიან ღამით მოხდა და არავინ დაშავებულა. შენობაში არსებული მძიმე ვითარების გამო, თეატრში სამუშაო პროცესი გაურკვეველი ვადით შეჩერდა. ობიექტის კაპიტალური შეკეთების საპროექტო მომსახურებაზე მერიის მიერ გამოცხადებული ტენდერი ორჯერ ჩაიშალა. დასი სპექტაკლებს სხვადასხვა ქალაქში მართავს.