სამართალი

ფეთჰულა გიულენს საერთოდ არ ვიცნობ, არც პირადად შემხვედრია- მუსტაფა ემრე ჩაბუკი

„დემირელის“ სახელობის სკოლის მენეჯერი და პედაგოგი მუსტაფა ემრე ჩაბუკი აცხადებს, რომ თურქ მქადაგებელ ფეთჰულა გიულენთან არანაირი კავშირი არ აქვს, არც პირადად იცნობს მას.

როგორც ჩაბუკმა სასამართლო პროცესზე განაცხადა, ის თავს დამნაშავედ არ ცნობს. მისი თქმით, მას საეჭვო ორგანიზაციისთვის არც ერთი თეთრი არ გადაურიცხავს.

დღევანდელ სხდომაზე ჩაბუქის ადვოკატები მისთვის ლტოლვილის სტატუსზე მიღებულ უარს ასაჩივრებდნენ.

„ჩემს მეგობრებთან ერთად 12 წელია, საქართველოს მომავლისთვის ვმუშაობ. არ ვარ მოძალადე ადამიანი, აქედან გამომდინარე, მე მყავს ბევრი ქართველი მეგობარი. არც საქართველოში, არც თურქეთში არასდროს მიტარებია იარაღი და არც კანონი დამირღვევია. თურქეთში სამწუხაროდ, ტყუილად მდებენ ბრალს იმაში, რაც არ ჩამიდენია და ტერორისტული ორგანიზაციის წევრობას მაბრალებენ. არც იქ და არც აქ, მე კავშირი არ მქონია ტერორისტულ ორგანიზაციებთან. ფეთჰულა გიულენს საერთოდ არ ვიცნობ, არასდროს შემხვედრია. გიულენი დემირელის კოლეჯის დირექტორი არ არის, არც პატრონი, არც მეწილე და არც მისი დაფუძნებული არ არის. მე მიყვარს ჩემი სამშობლო, საქართველოც მიყვარს. თურქეთში არიან დამნაშავეები, რა თქმა უნდა, და ისინი უნდა დაისაჯონ. მე არაფერი დანაშაული ჩამიდენია, მაგრამ მაბრალებენ, რომ ჩავიდინე“,- განაცხადა სასამართლო პროცესზე მუსტაფა ემრე ჩაბუქმა.

მონიკა დავლიანიძე