პოლიტიკა

ფედერიკა მოგერინი გიორგი კვირიკაშვილს: ჩვენი პარტნიორობა ძალიან კარგად მუშაობს

ჩვენი ურთიერთობები შესანიშნავია და ჩვენი პარტნიორობა ძალიან კარგად მუშაობს, - განაცხადა ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში ფედერიკა მოგერინიმ საქართველო-ევროკავშირის ასოცირების საბჭოს სხდომის შემდეგ, საქართველოს პრემიერ-მინისტრთან გამართულ ერთობლივ პრესკონფერენციაზე .

„ბოლო წლების განმავლობაში ჩვენმა მეგობრობამ ბევრი კარგი შედეგი გამოიღო: ესენია, ასოცირების ხელშეკრულების, თავისუფალი ვაჭრობისა და ვიზის ლიბერალიზაციის ძალაში შესვლა. დღეს ჩვენ ვხედავთ ბევრ შესაძლებლობას, რომელიც ჩვენს წინაშე გაიხსნა. ჩვენ დღეს ასევე ვისაუბრეთ იმ გზებზე, რომლითაც შევძლებთ ამ შესაძლებლობების გამოყენებას, რათა დავაკმაყოფილოთ ჩვენი მოქალაქეების მოლოდინები. ევროკავშირი სრულად მოწადინებულია ჩვენი პარტნიორობისა და მეგობრობის პოტენციალი გამოიყენოს. ასევე განვიხილეთ ის პროგრესი, რომელიც მიღწეულია ასოცირების ხელშეკრულების განხორციელების ფარგლებში და ის გამოწვევები, რომელიც რჩება“, - განაცხადა ფედერიკა მოგერინიმ.

აქვე, ევროკომისარმა მადლობა გადაუხადა საქართველოს მთავრობას რეფორმებზე მუშაობისთვის.

„მინდა მადლობა გადავუხადო საქართველოს პრემიერ-მინისტრს და დელეგაციის წევრებს. სასიამოვნოა თქვენთან მუშაობა. ჩვენ დავინახეთ თქვენი მტკიცე განწყობა რეფორმებზე მუშაობის თაობაზე. ახლა საჭიროა ამ რეფორმების სრულად განხორციელება და თქვენ შეგიძლიათ ჩვენი მხარდაჭერის იმედი გქონდეთ. ჩვენ ვისაუბრეთ საკონსტიტუციო რეფორმის, ასევე ადგილობრივი არჩევნების შედეგებზე. ადგილობრივი არჩევნები კონკურენტუნარიანი იყო და ჩვენ დავინახეთ, რომ ძირითადი თავისუფლებები დაცული იყო. ჩვენ შევთანხმდით, რომ საჭიროა ინკლუზიური პოლიტიკური გარემო უზრუნველყოფილი იყოს, ასევე ხელი უნდა შეეწყოს თავისუფალ და დამოუკიდებელ მედიას, დაცული უნდა იყოს კანონის უზენაესობა და სასამართლოს დამოუკიდებლობა. ევროკავშირი განაგრძობს თქვენს მხარდაჭერას ამ კუთხით. ევროკავშირი მხარს უჭერს საქართველოს ტერიტორიალურ მთლიანობას“, - განაცხადა მოგერინიმ.