პოლიტიკა

ფარული მოლაპარაკებები ერთგვარი ტენდენციის სახეს იძენს - თენგიზ ფხალაძე

საგარეო საკითხებში პრეზიდენტის მრჩეველმა, თენგიზ ფხალაძემ რუსეთისთვის დახმარების თხოვნის კომენტირებისას განაცხადა, რომ „ფარული მოლაპარაკებების“ ტენდენცია გამოვლინდა საქართველოს ხელისუფლებასა და რუსეთს შორის. მისი თქმით, მნიშვნელოვანია, საზოგადოებამ იცოდეს ხელისუფლების ყველა გადაწყვეტილება, რომელიც რუსეთს ეხება.

„უმთავრესი პრობლემა არის ინფორმაციის დამალვა მაშინ, როდესაც მიიღება ესა თუ ის მნიშვნელოვანი გადაწყვეტილება, მითუმეტეს, როდესაც ეს არის დაკავშირებული რუსეთის ფედერაციასთან. უაღრესად მნიშვნელოვანია, რომ ამის შესახებ საზოგადოებას მიეწოდებოდეს ამომწურავი ინფორმაცია და არ ხდებოდეს მის უკან მოლაპარაკებების წარმოება. ჩვენ გვახსოვს, რომ ასეთი შემთხვევა გვქონდა „გაზპრომთან“ მიმართებაში და ძალიან ცუდია, რომ ეს ყველაფერი ერთგვარი ტენდენციის სახეს იძენს“, - განაცხადა ფხალაძემ.

შეგახსენებთ, საქართველოს საგარეო საქმეთა უწყებამ დაადასტურა ინფორმაცია, რომ ხანძრის ჩასაქრობად დახმარებით მიმართა რუსეთს.

ანა მებურიშვილი