სამართალი

ფარულ საგამოძიებო მოქმედებებზე გასულ წელს 5931 ნებართვა გაიცა

უზენაესმა სასამართლომ ფარული საგამოძიებო რეესტრის 2017 წლის მონაცემები გამოაქვეყნა, რომელიც საქართველოს საქალაქო და რაიონულ სასამართლოებს მოიცავს.

მონაცემების მიხედვით, ყველაზე მეტი ნებართვა ფარულ საგამოძიებო მოქმედებებზე თბილისში გაიცა.

თბილისის მასშტაბით მსგავსი საგამოძიებო მოქმედებების ჩასატარებლად 3995 განაცხადი დაიწერა, საიდანაც 3916 დაკმაყოფილდა და უარი მხოლოდ 33 განაცხადზე ითქვა.

მეორე ადგილზე, ქუთაისია, სადაც საგამოძიებო უწყებებმა, ფარული მოქმედებების ჩასატარებლად, სასამართლოს თხოვნით 318-ჯერ მიმართეს და 312 შემთხვევაში ნებართვა მიიღეს, უარი მხოლოდ ორი განაცხდზე ითქვა. მესამე ადგილზე კი ბათუმია, სადაც 279 განაცხადიდან 275 დაკმაყოფილდა.

სტატისტიკის თანახმად, 22 ქალაქს შორის, ყველაზე ნაკლები განაცხადი საგამოძიებო მოქმედებებზე ახალციხეში დაფიქსირდა. განაცხადების რაოდენობა ორია. სასამართლომ ორივე მოთხოვნა, დააკმაყოფილა.

ქვეყნის მასშტაბით სულ ფარული საგამოძიებო მოქმედების ჩასატარებლად 6157 განაცხადი დაიწერა, საიდანაც დადებითად 5931 გადაწყდა, უარი კი 132 განაცხადზე ითქვა.

ფარული საგამოძიებო მოქმედებები ითვალისწინებს საგამოძიებო პროცესისთვის საჭიროების შემთხვევაში, პირის პირადი ინფორმაციის, სატელეფონო საუბრების, კომპიუტერული სისტემების, საფოსტო გზავნილებისა და სხვა საშუალებების კონტროლს. ასევე, ფარულ ვიდეო, ფოტო გადაღებას ან აუდიო ჩაწერის განხორციელებას.