სამართალი

ფადი ასლი და მისი პარტნიორები ქართული წარმოების სამტრო საქმეს აკეთებენ - იურისტი

სააქციო საზოგადოება „თბილისის თამბაქოს“ იურისტი გიგა კვერენჩხილაძე საერთაშორისო სავაჭრო პალატის ხელმძღვანელს, ფადი ასლის სასამართლოზე ზეწოლაში ადანაშაულებს.

გიგა კვერენჩხილაძე დღეს გამართულ ბრიფინგზე სს „თბილისის თამბაქოს“ და სს „ფილიპ მორის საქართველო“-ს შორის მიმდინარე სასამართლო დავასთან დაკავშირებით ფადი ასლის მიერ გაკეთებულ იმ განცხადებას გამოეხმაურა, რომელშიც ამ უკანასკნელმა აღნიშნა, რომ არ დაუშვებს უცხოურ ბიზნესებს ადგილობრივები ფულს ძალავდნენ.

გიგა კვერენჩხილაძემ საერთაშორისო სავაჭრო პალატის ხელმძღვანელის განცხადებებს უსაფუძვლო და პროვოკაციული უწოდა და ფადი ასლი მოსამართლის ღირსებისა და პატივის გამიზნულ შელახვაში, სასამართლოს დისკრედიტაციასა და მოდავე მხარეზე დაუსაბუთებელი და მიკერძოებულ თავდასხმაში დაადანაშაულა.

,,სასამართლოსა და მთავრობის დაშანტაჟებას ბატონი ფადი ასლი წარმატებით ახორცილებდა შევარდნაძის დროს, ჰქონდა მცდელობები სააკაშვილის პერიოდშიც და ცდილობს დღესაც.

ახალი ბატონ ასლის განცხადებებში, მისი ფობიური და დისკრიმინაციული პასაჟებია, როცა ამბობს, რომ არ დაუშვებს უცხოურ ბიზნესებს ადგილობრივები ფულს ძალავდნენ, მაგრამ სრულ იგნორს უკეთებს იმ უდაოდ დადასტურებულ ფაქტს, რომ ჩვენს შემთხვევაში, მიმტაცებლები სწორედ უცხოელი ბიზნესმენები არიან“, - აღნიშნა კვერენჩხილაძემ.

იურისტის განმარტებით, საქმე ის არის, რომ 2013 წლის 1 სექტემბრიდან მსხვილმა იმპორტიორმა კომპანიებმა დაიწყეს სიგარეტების რეალიზაცია თვითღირებულებით ან თვითღირებულებაზე ნაკლებ (დემპინგურ) ფასად. ამ ფაქტმა კი განაპირობა, რომ განუხრელად მცირდებოდა ქართული წარმოების წილი სიგარეტის ბაზრის არათუ საშუალო, არამედ დაბალ სეგმენტშიც, სადაც იგი წლების განმავლობაში სოლიდურად იყო წარმოდგენილი. ამის პროპორციულად იზრდებოდა იმპორტირებული სიგარეტის წილი.

კვერენჩხილაძის ინფორმაციით, თუ 2013 წელს საქართველოში თამბაქოს ბაზრის 35 პროცენტი ქართულ წარმოებაზე მოდიოდა, 2014 წელს იგი 28 პროცენტამდე შემცირდა, 2015-ში- 16 პროცენტამდე და 2016 წლის პირველი კვარტლის მონაცემებით 6 პროცენტამდე.

„ფადი ასლის საპასუხოდ, მინდა ვთქვა, რომ რეალურად ასეთია არაკეთილსინდისიერი იმპორტიორების მხრიდან არაჯანსაღი კონკურენციისა და უსამართლო დემპინგური ფასების გამოყენებით ქართული წარმოების გამიზნული მკვლელობის სავალალო ქრონიკა. ასეთი დანაშაულებრივი სქემები პირდაპირ უთხრის ძირს ქართული წარმოებას და საზოგადოება იმის თაობაზე მაინც უნდა იყოს ინფორმირებული, რომ ფადი ასლი და მისი პარტნიორები, საკუთარი საქმიანობით და განცხადებებით, ქართული წარმოების სამტრო საქმეს აკეთებენ“, - განაცხადა კვერენჩხილაძემ

მისივე თქმით, ანალოგიური დანაშაულებრივი სქემები მათ ოპონენტებს მთელს მსოფლიოში აქვთ აპრობირებული და ყველგან ასეთი ქმედებებისთვის ეს კომპანიები ასეულობით მილიონი დოლარით არიან დაჯარიმებული.

„როგორც ჩანს, ბატონ ასლის აღიზიანებს, რომ ჩვენც მსოფლიო პრაქტიკის შესაბამისად სასამართლოს მეშვეობით ვცდილობთ აღვადგინოთ სამართლიანობა. მართალია, მიყენებული ზარალისთვის, ჩვენს ოპონენტებს ჯერ მხოლოდ, პირველმა ინსტანციამ დააკისრა 92 მილიონი ლარი, მაგრამ დიდი იმედი გვაქვს, რომ სასამართლო ხელისუფლება არ დაყვება ფადი ასლის უპრეცედენტო ზეწოლას და უზრუნველყოფს ჩვენთვის თანაბარ პირობებს და სამართლიან სასამართლოს.

ბატონ ასლის და ოპონენტებს მოვუწოდებთ, დაუბრუნდნენ სამართლებრივ სივრცეს და ნუ შეექმნებათ შანტაჟით მიზნის მიღწევის ცრუ იმედი. ჩვენ არათუ ბოლომდე მივიყვანთ დავას, არამედ ჩვენს წვლილს შევიტანთ უზნეო ბიზნესმენებისგან ქართული წარმოების დაცვის საქმეში და საზოგადოებას დავანახებთ ვინ უჭერს მხარს ქართულ წარმოებას, საქართველოს მოქალაქეების დასაქმებას, მათი ოჯახების კეთილდღეობას და რა ინტერესები დგას ფადი ასლისა და ინვესტორის ყალბ მანტიას ამოფარებული სხვა არაკეთილსინდისიერი იმპორტიორების მიერ აგორებული საინფორმაციო კამპანიის უკან“, - განაცხადა ბრიფინგზე სს „თბილისის თამბაქოს“ იურისტმა.

ნინო ექვთიმიშვილი