პოლიტიკა

ევროსაბჭომ მოსკოვს უარი უთხრა სანქციების გაუქმებაზე - თამარ ჩუგოშვილი

რეზოლუცია, რომელიც ევროსაბჭოში რუსეთისთვის სანქციების მოხსნის შესაძლებლობას იძლეოდა, ავტორმა უკან გაიწვია - ევროსაბჭომ მოსკოვს უარი უთხრა სანქციების გაუქმებაზე, - განაცხადა პარლამენტის ვიცე სპიკერმა თამარ ჩუგოშვილმა.

მისი თქმით, რეზოლუცია დაბრუნდა კომიტეტებში, რაც ნიშნავს, რომ ამ ეტაპზე რუსეთს ევროსაბჭოში ხმის უფლება არ აღუდგება.

ჩუგოშვილის განცხადებით, ევროსაბჭო არ წავიდა კომპრომისზე და არ დაუშვა პრეცედენტი, რომ ნაკისრი ვალდებულებების შეუსრულებლობის შემდეგ რუსეთის ფედერაციას სანქციები მოხსნოდა.

„ეს არის ევროსაბჭოს დიდი გამარჯვება, რომ არ მიიღო რეზოლუცია და არ შეურბილა რუსეთის ფედერაციას მდგომარეობა. ეს იყო ძალიან მნიშვნელოვანი გზავნილი ევროპის მხრიდან რუსეთის მიმართ. მიუხედავად იმისა, რომ იყო ძალიან დიდი წნეხი მთელი ამ დღეებისა და გასული წლის განმავლობაში, მათ მაინც ვერ მოახერხეს იმ შედეგის მიღება, რა შედეგის მიღებაც სურდათ.

რაც შეეხება პროცედურულ საკითხს, უნდა შევიდეს თუ არა საპარლამენტო ასამბლეის საპროცესო წესებში რამე ცვლილება, ამაზე კომიტეტებში მომავალში გაგრძელდება მსჯელობა“, - განაცხადა საქართველოს პარლამენტის თავმჯდომარის პირველმა მოადგილემ თამარ ჩუგოშვილმა.

ევროპის საბჭოს საპარლამენტო ასამბლეამ გადაწყვიტა, კომიტეტში დააბრუნოს მოხსენება, რომელიც რუსეთისთვის სანქციების დაწესების წესების შეცვლას ითვალისწინებდა.