პოლიტიკა

„ევროპულმა საქართველომ“ პროკურატურას საკრებულოს მიერ მიღებული გადაწყვეტილების კანონიერების შესწავლას მოთხოვნით მიმართა

„ევროპული საქართველო“ პროკურატურას მიმართავს და ორი დღის წინ საკრებულოს მიერ მიღებული გადაწყვეტილების კანონიერების შესწავლას მოითხოვს.

როგორც პროკურატურაში მისვლისას „ევროპული საქართველოს“ თბილისის მერობის კანდიდატმა ელენე ხოშტარიამ ჟურნალისტებს განუცხადა, გაუსხვისებელი მიწის გასხვისებას სჭირდება 34 ხმა, პუშკინის სკვერთან დაკავშირებით გადაწყვეტილება 29 ხმით იყო მიღებული.

ხოშტარიას თქმით, ეს არის კონკრეტული დანაშაული, რის გამოც გამოძიება უნდა დაიწყოს.

„პროკურატურას მივმართავთ კიდევ ერთი უკანონობის და დანაშაულის შესახებ, რომელიც ამ პროცესში იყო დაშვებული. კერძოდ, პუშკინის გასხვისების დროს დაირღვა გასხვისების წესი. იმიტომ, რომ გაუსხვისებელი მიწის გასხვისებას სჭირდება 34 ხმა, რომელიც მათ არ ჰქონდათ. მხოლოდ 29 ხმით იყო მიღებული გადაწყვეტილება. ეს არის კონკრეტული დანაშაული. ამის საფუძველზე პირველ რიგში უნდა დაიწყოს გამოძიება და მეორე, რეესტრს არ აქვს უფლება დაარეგისტრიროს ეს გასხვისების აქტი და ეს პროცესი უნდა შეჩერდეს“,-განმარტა პოლიტიკოსმა.

მონიკა დავლიანიძე