პოლიტიკა

„ევროპულმა საქართველომ“ ე.წ. მოსმენების კანონის წინააღმდეგ საკონსტიტუციო სასამართლოში სარჩელი შეიტანა

დღეს საკონსტიტუციო სასამართლოში საპარლამენტო ფრაქციამ „ევროპულმა საქართველომ“ სარჩელი შეიტანა ე.წ. მოსმენების კანონის წინააღმდეგ.

პარტიის წევრის, ლადო ლომსაძის განცხადებით, ისინი ასაჩივრებენ კანონის იმ ნაწილს, რომლის მიხედვით მოსმენების განმახორციელებელი სააგენტო სუს-ის დაქვემდებარებაში იქნება.

„ჩვენ ვასაჩივრებთ კანონის იმ ნაწილს, რომელიც ითვალისწინებს ოპერატიულ-ტექნიკური სააგენტოს სუს-ის დაქვემდებარებაში დატოვებას, აგრეთვე იმ ნორმებს, რომლებიც ვერ უზრუნველყოფს ამ სისტემების მიერ მოსმენების განხორციელებაზე ეფექტურ კონტროლს“, - განაცხადა ლომსაძემ.

შეგახსენებთ, რომ 1-ლ მარტს პარლამენტმა მესამე მოსმენით მხარი დაუჭირა უმრავლესობის მიერ შემუშავებულ საკონსტიტუციო ცვლილებათა პაკეტს ე.წ. ფარული მოსმენების შესახებ. 20 მარტს პრეზიდენტმა ამ კანონს ვეტო დაადო, რომელიც პარლამენტმა ორი დღის შემდეგ დაძლია. ვეტოს დაძლევის შემდეგ ქვეყნის პირველმა პირმა ხელი მოაწერა ე.წ. ფარული მოსმენების კანონს, ხოლო 31 მარტს ის ამოქმედდა.

აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო.

ანა მებურიშვილი