პოლიტიკა

„ევროპულმა საქართველომ“ ე.წ. ფარული მოსმენების შესახებ მიმდინარე საპარლამენტო განხილვა პროტესტის ნიშნად დატოვა

საპარლამენტო ფრაქციამ „ევროპულმა საქართველომ“ ე.წ. ფარული მოსმენების შესახებ კანონპროექტის მეორე მოსმენასთან დაკავშირებული სხდომა პროტესტის ნიშნით დატოვა.

ფრაქციის წევრის, ოთარ კახიძის თქმით, ისინი აპროტესტებენ ეკა ბესელიას გადაწყვეტილებას, რომ პაკეტში შემავალი ერთ-ერთი კანონპროექტის „საჯარო სამართლის იურიდიული პირის – საქართველოს ოპერატიულ-ტექნიკური სააგენტოს შესახებ“ არა მუხლობრივად, არამედ თავების მიხედვით ყოფილიყო განხილული. პარლამენტის თავმჯდომარემ, ირაკლი კობახიძემ აღნიშნული ინიციატივა დააკმაყოფილა.

გარდა ამისა, კახიძე ადანაშაულებს ირაკლი კობახიძეს ოპოზიციისთვის ხელის შეშლაში.

„მიუხედავად იმისა, რომ პრაქტიკულად ამ განხილვების განმავლობში ყველანაირად შეგვიზღუდეთ აზრის გამოთქმის საშუალება, მოგვიხსენით ფრაქციების დროით გამოსვლის საშუალება, გვაწყვეტინებდით და გვითიშავდით მიკროფონებს, საბოლოოდ დღეს, პარლამენტის თავმჯდომარემ ხელი მოაწერა საქართველოს პარლამენტის სუს-ის ნოტარიუსად ქცევას. ამ ინიციატივით, რომელიც ქალბატონმა ეკა ბესელიამ დააყენა, ჩვენ პრაქტიკულად პარლამენტში გავხადეთ მთელი საკანონმდებლო პროცესი ფარსი. ჩვენ ამ ფარსში მონაწილეობას არ ვაპირებთ, ვინაიდან ეს არის ბიძინა ივანიშვილის დაცვის უფროსის დაკვეთით მომზადებული კანონპროექტი, რომელზეც საქართველოს პარლამენტმა მეორე მოსმენაზეც კი უარი განაცხადა. ჩვენ ამ ფარსში მონაწილეობას არ ვაპირებთ და ვტოვებთ სხდომას პროტესტის ნიშნად”, - განაცხადა ოთარ კახიძემ.

შეგახსენებთ, რომ პარლამენტში მეორე მოსმენით განიხილავენ საკონსტიტუციო ცვლილებათა პაკეტს ე.წ. ფარული მოსმენების შესახებ.

ანა მებურიშვილი