პოლიტიკა

„ევროპული საქართველოს“ წევრი ელენე ხოშტარია თბილისის მერს თბილისის გენგეგმაზე ერთობლივი მსჯელობისაკენ მოუწოდებს

„ევროპული საქართველოს“ წევრი ელენე ხოშტარია თბილისის მერს ემოციების გვერდზე გადადებას ურჩევს და ქალაქის მიწათსარგებლობის გენგეგმაზე ერთობლივი მსჯელობისაკენ მოუწოდებს.

,,ქალაქის გენგეგმა არ არის პარტიული დოკუმენტი, მეტიც, არ არის მერის დოკუმენტი. ეს არის მთლიანად ქალაქის დოკუმენტი. გენგეგმის მიხედვით გავლენა იქნება მთლიანად ყველა მოქალაქეზე, ამიტომ ძალიან მნიშვნელოვანია, რომ ჩვენ რეალურად შევძლოთ მსჯელობა, თუ რა ტიპის გენგეგმა გვექნება. ეს არის დოკუმენტი, რომელშიც უკვე „ქართული ოცნების“ ქალაქის მმართველობის პერიოდში დაიხარჯა მილიონობით ლარი, რომელზეც ბუნებრივია არსებობს დიდი მოლოდინი თუ რაში დავხარჯეთ ეს თანხა და რა არის ამის შედეგი,“-აცხადებს ელენე ხოშტარია.

ხოშტარიამ გუშინ ხმაურის ფონზე ჩავლილი თბილისის გენგეგმის განხილვა შეაფასა როგორც ძალიან სამწუხარო შემთხვევა, სადაც გენგეგმის ჯგუფის გაშვება ყველანაირი არგუმენტების გარეშე მოხდა.

„რაც ჩვენ ვნახეთ გუშინ, ეს იყო ძალიან სამწუხარო შემთხვევა. გენგეგმის ჯგუფის, ანუ მერიის კონტრაქტორის, პირდაპირ გასალანძღად შეკრებილი საჯარო შეხვედრა, სადაც ყველანაირი არგუმენტების გარეშე მოხდა ამ ჯგუფის გაშავება იმისთვის, რომ კახა კალაძემ ეს გეგმა არ მიიღოს. ეს არის არაკეთილსინდისიერი მიდგომა იმიტომ, რომ განხილვა ამ თემაზე უნდა იყოს, მაგრამ გადაბრალება ვიღაცაზე და თან დაუსაბუთებლად არის არასამართლიანი და არასწორი,“-ამბობს ხოშტარია.

ხოშტარიას შეფასებით, შეხვედრაზე ქალაქის მერმა განსხვავებული აზრის დაბლოკვა გადაწყვიტა.

კალაძის განმარტებით, პოლიტიკოსებისა და მერობის ყოფილი კანდიდატების მიწვევა საჯარო განხილვაზე მისი გადაწყვეტილება იყო. მათ კი, მნიშვნელოვანი დოკუმენტის განხილვაში მონაწილეობის ნაცვლად, დებოშის მოწყობა სცადეს.

თბილისის განვითარების გენერალური გეგმის პროექტი, რომელიც 2030 წლამდეა გაწერილი, თბილისის მერიას 3 იანვარს ჩაბარდა.

გენგეგმაზე მუშაობა 2015 წელს დაიწყო და დოკუმენტის შესაქმნელად 2 800 000 ლარი გამოიყო. მიწათსარგებლობის გენერალური გეგმის მე-6, საბოლოო ეტაპზე, მერიამ „სითი ინსტიტუტი“ერთი და იმავე შენიშვნის სამჯერ გაუთვალისწინებლობისთვის გასული წლის დეკემბერში 140 ათასი ლარით დააჯარიმა და შენიშვნების გამოსასწორებლად 45-დღიანი ვადა მისცა, რომელიც თებერვლის ბოლოს ამოიწურა.