პოლიტიკა

„ევროპული საქართველოს“ თბილისის მერობის კანდიდატი 27 მაისს გახდება ცნობილი

„მოძრაობა თავისუფლებისთვის-ევროპული საქართველოს“ წევრის, ირაკლი კიკნაველიძის განცხადებით, მათი თბილისის მერობის კანდიდატის ვინაობა 27 მაისს გახდება ცნობილი.

„ადგილობრივი თვითმმართველობის არჩევნები არის ძალიან მნიშვნელოვანი საქართველოსთვის. ჩვენი ქალაქების წინაშე დგას ძალიან დიდი პრობლემები, რომელთა გადაწყვეტასაც სერიოზული ადამიანები სჭირდება. ჩვენ აქტიურად განვიხილავთ თბილისის მერობის კანდიდატს, რომელიც აუცილებლად გვეყოლება. ეს საკითხი გადაწყდება შიდა დემოკრატიული წესით, რაც განუყოფელი ნაწილია ევროპული საქართველოს პოლიტიკური ცხოვრების.

„ევროპულ საქართველოს“ ბევრი ისეთი ლიდერი ჰყავს, რომელიც შეძლებს, რომ იყოს თბილისის ღირსეული მერი. სხვა ქალაქისა და, მათ შორის, თბილისის მერობის კანდიდატს ჩვენ დავასახელებთ 27 მაისს, თბილისში გამართულ პარტიის ყრილობაზე“,- განაცხადა კიკნაველიძემ.

ანა მებურიშვილი