პოლიტიკა

„ევროპული საქართველო“ ვენეციის კომისიას საკონსტიტუციო კომისიის მუშაობის შედეგზე ინფორმაციას მიაწვდის

„ევროპული საქართველოს“ წევრები ვენეციის კომისიის წევრებთან შეხვედრას გეგმავენ, რომ მიაწოდონ ინფორმაცია იმის შესახებ, რომ საკონსტიტუციო ცვლილებებზე მომუშავე კომისიამ, ახალი კონსტიტუციის პროექტი ერთპარტიულ რეჟიმში მიიღო.

ამის შესახებ პარტიის ერთ-ერთმა ლიდერმა, დავით ბაქრაძემ, მედიას ბრიუსელში განუცხადა, სადაც დღეს, ევროპის საბჭოს საპარლამენტო ასამბლეის საგაზაფხულო სესიის პირველი სხდომა გაიმართება.

„ნებისმიერი კონსტიტუცია უნდა იყოს პოლიტუკური კონსენსუსის პროდუქტი. მას უნდა ეთანხმებოდეს ქვეყანაში არსებული პოლიტიკური ძალების უმრავლესობა და სწორედ ასეთ შემთხვევაში ხდება კონსტიტუცია სტაბილური პოლიტიკური სისტემის საფუძველი. ძალიან ვწუხვარ, რომ „ქართულმა ოცნებამ“ ეს ვერ გაიაზრა და მათ, პრაქტიკულად, ერთპარტიული კომისია წარმოადგინეს და მიიღეს კონსტიტუციის ის ვარიანტი, რომელიც დღეს გვაქვს. ამიტომ, ასეთ სიტუაციაში გადამწყვეტი მნიშვნელობა ექნება უცხოელი პარტნიორების პოზიციას, მათ შორის ვენეციის კომისიის პოზიციას“,-აღნიშნა დავით ბაქრაძემ.

ევროპის საბჭოს საპარლამენტო ასამბლეის ფარგლებში, ვენეციის კომისიის წარმომადგენლებს, საპარლამენტო უმრავლესობის წევრებიც შეხვდებიან.

მონიკა დავლიანიძე