პოლიტიკა

„ევროპული საქართველო“ ვახტანგ გომელაურსა და გიორგი მღებრიშვილს პარლამენტში იბარებს

ფრაქცია „ევროპული საქართველო“ სახელმწიფო უსაფრთხოების სამსახურის უფროსს, ვახტანგ გომელაურსა და შინაგან საქმეთა მინისტრს, გიორგი მღებრიშვილს პარლამენტში იბარებს.

როგორც ჟურნალისტებს ფრაქციის წევრმა, ოთარ კახიძემ განუცხადა, უმცირესობის ფორმატში ის კითხვები დაისმება, რომელიც მთელ საზოგადოებას, ჟურნალისტთა კორპუსსა და არასამთავრობო ორგანიზაციებს აქვთ.

„აფგან მუხტარლის განცხადებით, ის საქართველოს კრიმინალური პოლიციის ფორმაში ჩაცმულმა, ქართულად მოსაუბრე სამართალდამცველებმა დააკავეს და შემდეგ, მოულოდნელად აზერბაიჯანის ტერიტორიაზე აღმოჩნდა. გვაინტერესებს, ეს როგორ მოხდა? - ეს მიუღებელი ფაქტია, რომელსაც ადგილი ჰქონდა და ის კომენტარები, რომელსაც საქართველოს ხელისუფლება აკეთებს, კიდევ უფრო კატასტროფულია. ფაქტობრივად, ქმედითი სახელმწიფო ინსტიტუტების ჩამოშლის წინაშე ვდგავართ და თუ ამ ფაქტს ეფექტური რეაგირება არ მოჰყვა, ეს გაცილებით მძიმე შედეგების მომტანი იქნება, რადგან ამით ზიანი საქართველოს რეპუტაციას ადგება და საქართველო ქვეყანა აღარ იქნება, სადაც დაცულია ადამიანის უფლებები, გარანტირებულია ადამიანის უსაფრთხოება და მიმზიდველია ტურისტისთვის, ინვესტორისთვის. ეს ქვეყნის ინტერესებზე დარტყმაა“, - განაცხადა კახიძემ.

ნინო ექვთიმიშვილი