პოლიტიკა

`ევროპული საქართველო` თავდაცვის სამინისტროს თანხების არამიზნობრივ ხარჯვაში ადანაშაულებს

“ევროპული საქართველო” თავდაცვის სამინისტროს თანხების არამიზნობრივ ხარჯვაში ადანაშაულებს.

ოპოზიციური პარტიის წევრის ირაკლი აბესაძის განცხადებით, აუდიტის დასკვნა ადასტურებს, რომ თავდაცვის სფეროში მდგომარეობა მძიმეა.

,,მიმდინარე კვირაში გაიმართება ნდობის ჯგუფის მორიგი შეხვედრა, სადაც წარმოდგენილი იქნება ანგარიში აუდიტის სამსახურის მხრიდან თავდაცვის სამინისტროში 2015-2016 წლებში განხორციელებულ საიდუმლო შესყიდვებზე.

წლების განმავლობაში, “ევროპული საქართველოს” წევრები ბიუჯეტის ღია ნაწილის შესწავლის და “ქართული ოცნების” პოლიტიკური ნაბიჯების გაანალიზების შედეგად ვსაუბრობდით, რომ “ქართული ოცნების” სამთავრობო გუნდის დამოკიდებულება ამ სფეროსადმი არ შეესაბამება ქვეყნის თავდაცვისუნარიანობის გაზრდის მიზანს და სამინისტროსათვის გამოყოფილი თანხების მნიშვნელოვანი ნაწილი არამიზნობრივად იხარჯება. მაგალითად, სამინისტროს სამოქალაქო ნაწილი გასული წლების განმავლობაში შეუსაბამოდ და დაუსაბუთებლად გაიბერა და როგორც ჩანს, აქაც კი ნეპოტისტური ნიშნით საქმდებოდნენ ადამიანები, რომელთა შენახვაზეც იფლანგებოდა სამინისტროს ბიუჯეტის მნიშვნელოვანი ნაწილი”,- აცხადებს აბესაძე.

მისი თქმით, პასუხისმგებლობა აღწერილ პრობლემებზე ეკისრება “ქართული ოცნების” მთლიან სამთავრობო გუნდს და არა მხოლოდ თავდაცვის მინისტრს.

,,შესაბამისად, მიგვაჩნია, რომ ამ სიტუაციაში მნიშვნელოვანია, საქართველოს პარლამენტში გაიმართოს შეხვედრა შესაბამის მინისტრებთან უფრო გაფართოებულ ფორმატში ვიდრე ნდობის ჯგუფია, თუნდაც დახურულ რეჟიმში, ოპოზიციის მონაწილეობით, სადაც მოვისმენთ პასუხებს აღწერილ პრობლემებზე და რაც მთავარია, დავსახავთ შემდგომ პოლიტიკურ ნაბიჯებს იმისათვის, რომ რეალურად თავდაცვის მიმართულებით გამოყოფილი ფინანსები ხმარდებოდეს ქვეყნის თავდაცვისუნარიანობის გაზრდას და არ იფლანგებოდეს უმიზნოდ”,- აღნიშნა აბესაძემ.