კომენტარი

„ევროპული საქართველო“ სახალხო განხილვების კომისიაში მონაწილეობას არ მიიღებს

„ევროპული საქართველო“ საკონსტიტუციო ცვლილებებთან დაკავშირებით, საყოველთაო სახალხო განხილვების კომისიაში მონაწილეობას არ მიიღებს.

ამის შესახებ ბრიფინგზე პარტიის ერთ-ერთმა ლიდერმა დავით ბაქრაძემ განაცხადა.

პოლიტიკოსმა მიღებული გადაწყვეტილების რამდენიმე მიზეზი დაასახელა.

„პირველი მიზეზი არის ის, რომ გუშინვე უმრავლესობის ლიდერებისგან ძალიან მკაფიოდ მოვისმინეთ, რომ კომისიის მუშაობას არ მოყვება არანაირი შინაარსობრივი ცვლილება კონსტიტუციაში და ამ კომისიის შექმნის ერთადერთი მიზანი, გახლავთ, წინასწარ დაანონსებული ოთხი ცვლილების მიღება. ფაქტიურად, საპარლამენტო უმრავლესობა ოპოზიციას დიალოგის კარი დაუხურა მანამ, სანამ დიალოგის პროცესი დაიწყებოდა.

მიზეზი მეორე, წარმორდგენილი ოთხი ცვლილება ატარებს პოზიტიურ ხასიათს, მაგრამ ოთხივე მათგანი გახლავთ ორი კვირის წინ „ქართული ოცნების“ მიერ გაფუჭებულის გამოსწორება. საიდან გაჩნდა ბონუსი კონსტიტუციაში, საიდან გაჩნდა ბლოკების აკრძალვა, საიდან გაჩნდა რელიგიური თავისუფლების შეზღუდვა - ეს ყველაფერი „ქართულმა ოცნებამ“ გააჩინა ორი კვირის წინ მიღებულ კონსტიტუციაში. ამიტომ ის ფაქტი, რომ დღეს „ქართული ოცნება“ საერთაშორისო ზეწოლით, ცდილობს გამოასწოროს საკუთარი გაფუჭებული, ვერანაირად ვერ გამოდგება კონსენსუსის და პოლიტკური შეთანხმების საფუძვლად.

მესამე მიზეზი არის თავად უმრავლესობის დამოკიდებულება სახალხო განხილვის პროცესის მიმართ. ჩვენ გვახსოვს, წინა საკონსტიტუციო ცვლილებები და სახალხო განხილვის პროცესი, როდესაც ყველა შეხვედრაზე უმრავლესობა განიხილავდა პროექტს, სადაც საპარლამენტო სისტემა იცვლებოდა და პროპორციულ სისტემაზე გადასვლა ხდებოდა 2020 წელს. შემდეგ კი, მოულოდნელად შეცვალეს საზოგადოებასთან შეთანხმებული პროექტი ისე, რომ არც კი უფიქრიათ ხალხთან ერთი შეხვედრა მაინც გაემართათ.

„ევროპული საქართველო“ ვადასტურებთ მზადყოფნას ვიმუშავოთ კონსენსუსისთვის, ვიმუშავოთ შეთანხმებისთვის, ოღონდ ამის საშუალება, პირველ რიგში, უნდა მოგვცეს უმრავლესობამ“,-განაცხადა დავით ბაქრაძემ.

გუშინ, პარლამენტის თავმჯდომარე გამოვიდა ინიციატივით, რომ შეიქმნება საყოველთაო სახალხო განხილვების კომისია, რომელიც დაახლოებით ერთი თვის განმავლობაში იმუშავებს.

მონიკა დავლიანიძე