პოლიტიკა

„ევროპული საქართველო“ ხორბლის იმპორტის საკითხზე ფინანსთა და სოფლის მეურნეობის მინისტრებს პარლამენტში იბარებს

„ევროპულმა საქართველომ“ ხორბლის იმპორტის საკითხზე ფინანსთა მინისტრი ივანე მაჭავარიანი და სოფლის მეურნეობის მინისტრი ლევან დავითაშვილი პარლამენტში დაიბარა.

„ევროპული საქართველოს“ ერთ-ერთი ლიდერის, სერგო რატიანის განცხადებით, მინისტრები პარლამენტში უნდა მივიდნენ და ახსნან იმ ბრძანების მიზეზი, რომელიც ხორბლის ავტომობილებით ტრანსპორტირებას კრძალავს.

„არგუმენტი ჯერ არ არსებობს. ერთადერთი რაციონალური ეჭვი არის ის, რომ ამის უკან დგას უბრალოდ კორუფცია და ამიტომ ამ ადამიანებს ართმევენ ლუკმა-პურს. ფინანსთა მინისტრის ეს ბრძანება უნდა გაუქმდეს. მინისტრი უნდა მოვიდეს პარლამენტში, შეხვდეს „ევროპულ საქართველოს“ და აუხსნას თავის ქმედების მიზეზები“, – განაცხადა დეპუტატმა.

ლილოში, გაფორმების ეკონომიკურ ზონასთან ხორბლის იმპორტიორები საპროტესტო აქციას, რომელიც დღესაც გრძელდება, არასამთავრობო ორგანიზაციების ნაწილიც შეუერთდა. არასამთავრობო ორგანიზაცია Hub Georgia-ის აღმასრულებელი დირექტორის, ვასო ურუშაძის შეფასებით, ფინანსთა მინისტრი ბრძანება კონკურენციის შესახებ კანონთან წინააღმდეგობაში მოდის და მისი ბათილად ცნობის მიზნით სასამართლოს მიმართავს.

გუშინ ხორბლის იმპორტიორებმა აქცია დაიწყეს. ისინი ფინანსთა სამინისტროს ბიზნესის თავისუფლების შეზღუდვაში ადანაშაულებენ და გადაწყვეტილების შესაცვლელად ორდღიან ვადას აძლევენ.

ავტოსატრანსპორტო საშუალებით ხორბლის ან ხორბალ-ჭვავის ფქვილის შემოტანა-გატანის აკრძალვა 15 სექტემბრიდან იყო დაგეგმილი, თუმცა პირველ ოქტომბრამდე გადავადდა.

ფინანსთა სამინისტროს შემოსავლების სამსახურმა ლილოში, გაფორმების ეკონომიკურ ზონასთან შექმნილი ვითარების შესახებ განცხადება გაავრცელა. შემოსავლების სამსახური დიალოგისთვის მზადყოფნას გამოთქვამს და ხორბლის იმპორტიორებს მოუწოდებს, საინიციატივო ჯგუფი შექმნან.