პოლიტიკა

„ევროპული საქართველო“ კახა კალაძეს და მერიის რამდენიმე საქალაქო სამსახურის ხელმძღვანელს საკრებულოში იბარებს

„ევროპული საქართველო“ დედაქალაქის მერს და რამდენიმე საქალაქო სამსახურის ხელმძღვანელს მეტროსადგურ ,,ვარკეთილში“ მომხდარის გამო თბილისის საკრებულოში იბარებს.

„ევროპული საქართველოს“ ფრაქციის წევრის, გოკა გაბაშვილის თქმით, დედაქალაქის მთავრობას რამდენიმე კითხვაზე აქვს პასუხი გასაცემი, მათ შორის, იმაზე თუ რატომ მოხდა ხელშეკრულების გაფორმება ისეთ კომპანიასთან, რომელსაც მსგავსი სამუშაოების ჩატარების გამოცდილება არ ჰქონდა და თან „შავ სიაშიც“ იყო.

„საზოგადოებისთვის ცნობილი ხდება, რომ ამ კომპანიას არ ჰქონდა მსგავსი ტიპის სამუშაოების შესრულების გამოცდილება და ერთი წლით ადრე ის იმყოფებოდა შავ სიაში. უნდა გაეცეს პასუხი რატომ იყო ამგვარად შედგენილი საკვალიფიკაციო მოთხოვნები. მეორე ძალიან მნიშვნელოვანი შეკითხვაა ის, რომ თუ ექსპერტები ურჩევდნენ, რომ არ უნდა გაკეთებულიყო შეკიდული ჭერის კონსტრუქცია, ვიბრაციისა და სხვადასხვა ფაქტორების გამო, რატომ გადაწყდა მაინც ამის გაკეთება. ასევე, პასუხი უნდა გაეცეს კითხვას, თუ რატომ ჩაიდო ხელშეკრულებაში, რომ ახალი კონსტრუქცია გაკეთებულიყო ძველ კონსტრუქციაზე“- განაცხადა გოკა გაბაშვილმა.