პოლიტიკა

,,ევროპული საქართველო’’ ადგილობრივი თვითმმართველობის არჩევნებზე პლებისციტის დანიშვნის ინიციატივით გამოდის

“ევროპული საქართველო’’ ხელისუფლებას სთავაზობს, რომ ადგილობრივი თვითმმართველობის არჩევნებზე დაინიშნოს პლებისციტი, სადაც გადაწყდება პრეზიდენტის არჩევითობის და საარჩევნო სისტემის საკითხი.

შესაბამისი განცხადება პარტიის წევრმა, ელენე ხოშტარიამ დღეს გამართულ ბრიფინგზე გააკეთა.

მისი თქმით, ვენეციის კომისიის პრეზიდენტის განცხადებამ კიდევ ერთხელ აჩვენა, თუ როგორ ჩიხში შეიყვანა ხელისუფლებამ საკონსტიტუციო ცვლილებების პროცესი.

“მათი ერთადერთი არგუმენტი, თითქოს ვენეციის კომისიიდან მხარდაჭერა გააჩნდათ, გაქარწყლდა. ჩვენ ვხედავთ, რომ როგორც ქვეყნის შიგნით, ასევე ქვეყნის გარეთ, ყველას აქვს მოლოდინი, რომ ამ ჩიხური სიტუაციიდან გამოვიდეს ჩვენი ქვეყანა. აქედან გამომდინარე, ჩვენ კიდევ ერთხელ ვთავაზობთ ხელისუფლებას ამ ჩიხურ ვითარებაში, რომ მივმართოთ ერთადერთ ნორმალურ, საღ გამოსავალს – პლებისციტს. ვკითხოთ ხალხს, თუ როგორი უნდა იყოს ჩვენი საარჩევნო სისტემა და როგორ უნდა გადაწყდეს პრეზიდენტის არჩევითობის საკითხი”, - განაცხადა ელენე ხოშტარიამ.

მისი თქმით, არსებობს მოკლე დროში შეგროვებული 154 000 ხელმოწერა, სადაც ადამიანები ითხოვენ, რომ მათ ჰკითხონ ქვეყნის მოწყობის საკითხი.

“ვერ შედგა კონსენსუსი პოლიტიკურ ძალებს შორის, საზოგადოებრივ ჯგუფებს შორის, ხელისუფლების ძალიან ჯიუტი, არაგონივრული პოზიციის გამო. დღეს ჩვენ მივიღეთ ძალიან მძიმე კრიტიკა ჩვენი ძალიან მნიშვნელოვანი საერთაშორისო პარტნიორისგან. აქედან გამომდინარე, ვთავაზობთ ხალისუფლებას, რომ ადგილობრივი თვითმმართველობის არჩევნებზე დაინიშნოს პლებისციტი, სადაც გადაწყდება პრეზიდენტის არჩევითობისა და საარჩევნო სისტემის საკითხი”, - განაცხადა ელენე ხოშტარიამ.

ნინო ექვთიმიშვილი