პოლიტიკა

ევროპარლამენტარები შავ სიაში მყოფი მოქალაქეებისთვის საბანკო დავალიანების განულების ინიციატივისგან შოკში ჩავარდნენ - გიორგი ვაშაძე

გაერთიანებული ოპოზიციის საპრეზიდნეტო კანდიდატის, გრიგოლ ვაშაძის საარჩევნო კამპანიის ხელმძღვანელის, გიორგი ვაშაძის განცხადებით, ევროპარლამენტარებმა ჭარბვალიანობის აღმოფხვრის მიზნით გაცხადებული ინიციატივის შესახებ ძალიან საგანგაშო განცხადებები გააკეთეს.

„ასეთი განცხადებები ევროპარლამენტარებს საქართველოსთან მიმართებაში არასდროს არ გაუკეთებიათ. კიდევ ერთხელ მინდა მოვუწოდო „ქართულ ოცნებას“ - დაანებეთ თავი ამ სისულელეებს. რუმინელი კომუნისტის განცხადება მოგწონდათ და ევროპელი ლიდერების განცხადებები არ მოგწონთ? არ გრცხვენიათ? შეადარეთ ერთმანეთს პრორუსი ლატვიელის განცხადება, რომელიც ყირიმის ანექსიას აღიარებს, კარგი იყო და ევროპელი პარლამენტარების განცხადებები, რომლებსაც მთელი ევროპა უსმენს, ჩვენ მიერ არის დაგეგმილი?“,- განაცხადა ვაშაძემ.

მისივე თქმით, თუ ვინმეს ეგონა, რომ ეს ტყუილით მასობრივი მოსყიდვის აქტი დარჩებოდა რეაგირების გარეშე საერთაშორისო საზოგადოების მხრიდან, ძალიან ცდებოდა.

„ასეთი პრეცედენტი მსოფლიოში არ ყოფილა. შოკში ჩავარდნენ ევროპარლამენტარები. ისინიც პოლიტიკაში არიან, ისინიც მონაწილეობენ არჩევნებში და კარგად იციან, რა არის საარჩევნო სტანდარტი. ასეთი არაფერი არ გაუგიათ“, - აღნიშნა ვაშაძემ.