პოლიტიკა

ევროპა კიდევ უფრო დაუახლოვდა საქართველოს და საქართველო კიდევ უფრო დაუახლოვდა ევროპას - პრეზიდენტი

საქართველოს პრეზიდენტმა, გიორგი მარგველაშვილმა აღნიშნა, რომ ევროკავშირი საქართველოს უმნიშვნელოვანესი პარტნიორია. ამის შესახებ მან ბრიუსელში, ევროპის საბჭოს პრეზიდენტთან დონალდ ტუსკთან გამართულ ერთობლივ პრესკონფერენციაზე განაცხადა.

„ევროპა საქართველოსთვის ნომერ პირველი სავაჭრო პარტნიორი გახდა, თანამშრომლობის მჭიდრო ფორმატი გვაქვს და მჯერა, რომ მომავალში ის კიდევ უფრო გაფართოვდება“, - აღნიშნა მარგველაშვილმა.

პრეზიდენტმა მზადყოფნა გამოთქვა, რომ საქართველო, უფრო ეფექტურად ითანამშრომლოს უვიზო მიმოსვლასთან დაკავშირებით.

„უვიზო რეჟიმის ფორმატთან დაკავშირებით მთავრობამ ძალიან აქტიური და საპასუხისმგებლო პოზიცია დაიკავა ყველა იმ საკითხზე, რომლებიც ჩვენმა პარტნიორებმა დააყენეს და მზად ვართ, ყველაფერი გავაკეთოთ, რათა უფრო ეფექტურად ვითანამშრომლოთ“, - განაცხადა პრეზიდენტმა.

მარგველაშვილმა აღნიშნა, რომ ასოციარების შეთანხმების, თავისუფალი ვაჭრობისა და ვიზალიბერალიზაციის სახით „ევროპა კიდევ უფრო დაუახლოვდა საქართველოს, ხოლო საქართველო კიდევ უფრო დაუახლოვდა ევროპას“.