პოლიტიკა

ევროკავშირმა და ევროსაბჭომ საქართველოში საერთო პროგრამამებში ბოლო პერიოდში 4 მილიონამდე ევრო დახარჯეს - დავით ზალკალიანი

საქართველოს საგარეო საქმეთა მინისტრის მოადგილის, დავით ზალკალიანის განცხადებით, ევროკავშირმა და ევროსაბჭომ საქართველოში საერთო პროგრამამებში ბოლო პერიოდში ჯამში ოთხ მილიონამდე ევრო დახარჯეს.

ამის შესახებ ზალკალიანმა მედიას ევროკავშირისა და ევროპის საბჭოს ერთობლივი პროგრამის ყოველწლიური საკოორდინაციო შეხვედრის ფარგლებში განუცხადა.

„ძალიან მნიშვნელოვანია, რომ საქართველო ამ ორგანიზაციებთან თანამშრომლობს ისეთ საკითხებში როგორიცაა ადამიანის უფლებები, კანონის უზენაესობა და დემოკრატიული ინსტიტუტების განვითარება, რაც ჩვენ ევროპულ სტანდარტებთან დაახლოებაში გვეხმარება. ამ პერიოდის განმავლობაში რვა პროექტი განხორციელდა, რომლის ბიუჯეტი თითქმის ოთხი მილიონი ევრო გახლდათ. მნიშვნელოვანია, რომ საქართველო მთელი ამ პერიოდის განმავლობაში დემოკრატიული ინსტიტუტების განმტკიცების თვალსაზრისით იმ სტანდარტებს უახლოვდებოდა, რომელსაც ევროკავშირი და ევროპის საბჭო ითვალისწინებს.

ბოლო პერიოდის განმავლობაში ჩვენ ძალიან ხელშესახები შედეგები გვაქვს, რისი დასტურიც საერთაშორისო თანამეგობრობის აღიარებაა. თუნდაც ის ფაქტი, რომ საქართველო ღია მმართველობის ორგანიზაციის თავმჯდომარე გახდა, აღიარებას მიუთითებს“,- აღნიშნა ზალკალიანმა.

მონიკა დავლიანიძე