პოლიტიკა

ევროკავშირის სტრატეგიულ დოკუმენტში საქართველო არის განსაზღვრული როგორც სანდო და დასაყრდენი პარტნიორი - მიხეილ ჯანელიძე

საქართველოს საგარეო საქმეთა მინისტრის, მიხეილ ჯანელიძის განცხადებით, ევროკავშირის მიერ საგარეო და უსაფრთხოების პოლიტიკასთან დაკავშირებით შემუშავებულ ახალ დოკუმენტში, საქართველოს უჭირავს ძალიან მნიშვნელოვანი ადგილი.

როგორც საქართველოს საგარეო უწყების ხელმძღვანელმა ტელეკომპანია ,,იმედის’’ ეთერში განაცხადა, ევროკავშირის დოკუმენტში საქართველო არის განსაზღვრული როგორც სანდო და დასაყრდენი პარტნიორი.

,,ევროკავშირმა, ახლახან შეიმუშავა ახალი გლობალური სტრატეგია საგარეო და უსაფრთხოების პოლიტიკის და ამ მნიშვნელოვან დოკუმენტში საქართველოს უჭირავს ძალიან მნიშვნელოვანი ადგილი; საქართველო არის განსაზღვრული როგორც სანდო და დასაყრდენი პარტნიორი. ჩვენ ამ საკითხებზე საუბარი გვქონდა ევროკავშირში გამართული შეხვედრების ფარგლებში, ასოცირების საბჭოს ფარგლებში ბრიუსელში ვიზიტისას, სადაც გამოვთქვით მზადყოფნა კიდევ უფრო მეტად გაღრმავებული ურთიერთობების, უსაფრთხოების და თავდაცვის სფეროში. ჩვენ ვთანამშრომლობთ ტერორიზმის წინააღმდეგ ქმედებების კუთხით. ასევე, ვთანამშრომლობთ კიბერუსაფრთხოების სფეროში ორგანიზებულ დანაშაულებთან ბრძოლის მიმართულებით, თუ საერთაშორისო მისიებში, რომლებსაც ევროკავშირი ახორციელებს. ამ ჩვენი მონაწილეობით, რა თქმა უნდა, ძალიან დიდ ფუნქციას ვასრულებთ’’, - განაცხადა ჯანელიძემ.

მისივე თქმით, ევროკავშირის მისიებში საქართველოს როლის შესახებ ხაზგასმული იქნა თბილისში მიმდინარე რეგიონული ამბასადორიალის ფარგლებში ფრანგი და გერმანელი დიპლომარების მხრიდანაც.

,,ჩვენ ასევე გერმანიასა და საფრანგეთთან, ვსაუბრობთ კიდევ უფრო გაღრმავებულ თანამშრომლობაზე და გვინდა, რომ ის ფართო სპექტრი ურთიერთობების, რომელიც დღეს გვაქვს, გადავიყვანოთ კიდევ უფრო მაღალ სტატუსში და საქართველო მოიაზრებოდეს, როგორც პოლიტიკურად, ასევე ეკონომიკურად და უსაფრთხოების კუთხით ერთ-ერთ მნიშვნელოვან დასაყრდენად რეგიონში’’, - აღნიშნა საქართველოს საგარეო საქმეთა მინისტრმა.

ნინო ექვთიმიშვილი