პოლიტიკა

ევროკავშირი და ნატო მიესალმებიან მაკედონიის სახელწოდების შეცვლის შესახებ პარლამენტის მიერ მიღებულ გადაწყვეტილებას

ევროკავშირი და ნატო მიესალმებიან მაკედონიის პარლამენტის გადაწყვეტილებას, მხარი დაუჭიროს მთავრობის ინიციატივას ქვეყნის სახელწოდების შეცვლის შესახებ.

ნატო-ს გენერალური მდივნის იენს სტოლტენბერგის განცხადებით, ახლა მთავრობასა და პოლიტიკურ ლიდერებზეა დამოკიდებული, გამოიყენებს თუ არა მაკედონია ამ ისტორიულ შესაძლებლობას.

გაფართოებისა და სამეზობლო პოლიტიკის საკითხებში ევროკომისარმა იოჰანეს ჰანმა კენჭისყრას „დემოკრატიისთვის განსაკუთრებული დღე“ უწოდა.

„ვულოცავ ყველას, ვინც ევროკავშირში გაწევრიანების გზა აირჩია. ვიმედოვნებ, რომ ყველა დეპუტატის, მათ შორის „ბარიკადების მეორე მხარეს მყოფების“ თავისუფალი არჩევანი დაცული იქნება“, - დაწერა ჰანმა „ტვიტერის“ საკუთარ გვერდზე.

ცნობისთვის, გუშინ მაკედონიის პარლამენტმა მხარი დაუჭირა ქვეყნის სახელწოდების შეცვლას. მთავრობის ინიციატივას - მაკედონიას სახელი შეეცვალოს და „ჩრდილოეთ მაკედონია“ დაერქვას, მხარი 120-დან 80-მა დეპუტატმა დაუჭირა.

ახლა ცვლილებების მისაღებად პარლამენტს კიდევ ორი კენჭისყრა - მარტივი და საკონსტიტუციო უმრავლესობით დამტკიცება სჭირდება.