პოლიტიკა

ევა გოცირიძის კრიტიკა სტრასბურგის სასამართლოს მიმართ სრულ თანხვედრაშია ხელისუფლების მიერ გამოთქმულ პრეტენზიებთან - ლევან სამუშია

პარტია „თავისუფალი დემოკრატების“ აღმასრულებელი მდივანი ლევან სამუშია საქართველოს იუსტიციის უმაღლესი საბჭოს წევრის, ევა გოცირიძის წერილს გამოეხმაურა, რომლის თანახმად, ევროსასამართლოს გადაწყვეტილება „რუსთავი 2“-ის საქმეზე უარყოფითად აისახება მართლმსაჯულების ეფექტიანობაზე.

სამუშიას განცხადებით, გოცირიძის მოსაზრება ჰგავს უმრავლესობის პრეტენზიებს სტრასბურგის სასამართლოს მიმართ.

„შემაშფოთებელია ევროპის საბჭოს მიერ ევროპის სასამართლოში დაწუნებული მოსამართლეობის კანდიდატისა და საქართველოს იუსტიციის საბჭოს წევრის ევა გოცირიძის განცხადება ,,რუსთავი 2“-ის საქმესთან დაკავშირებით. ის სრულ თანხვედრაშია ბოლო დროს „ქართული ოცნების“ ხელისუფლების მაღალჩინოსნების მიერ გამოთქმულ პრეტენზიებთან ევროპის ადამიანის უფლებათა სასამართლოსთან მიმართებაში. ქალბატონი გოცირიძის მხრიდან კრიტიკა შეიძლება ჩაითვალოს , როგორც ერთი მხრივ დაინტერესებული მხარის განცხადებად , ხოლო მეორე მხრივ, ადამიანისა, რომელიც ევროპის საბჭომ, როგორც მოსამართლეობის კანდიდატი დაიწუნა და ის აკრიტიკებს ადამიანის უფლებათა ევროპულ სასამართლოს“,- თქვა სამუშიამ.

სამუშიას თქმით, როგორც გოცირიძე, ასევე მმართველი გუნდი საკუთრების უფლების დაცვით ხელმძღვანელობენ.

„მიმაჩნია, რომ მნიშვნელოვანია ყურადღების გამახვილება იმაზე, თუ როგორ აპელირებს „ქართული ოცნება“ და მისი შემადგენელი ნაწილი - ქალბატონი გოცირიძე, საკუთრების უფლებაზე“, - განაცხადა სამუშიამ.

მან აღნიშნა, რომ ხელისუფლების უნდობლობა სტრასბურგის სასამართლოს მიმართ „ძალიან საგანგაშოა და საფრთხეს უქმნის ქვეყნის ევროპულ მისწრაფებას“.

სამუშიამ განაცხადა, რომ სასამართლოს აბრკოლებს არა სტრასბურგი, არამედ მისი პოლიტიზირება და მართვა პოლიტიკური ხელმძღვანელობის მხრიდან.

შეგახსენებთ, რომ საქართველოს იუსტიციის უმაღლესი საბჭოს წევრმა და ევროსასამართლოს წევრობის დაწუნებულ კანდიდატმა, ევა გოცირიძემ დღეს გამოქვეყნებულ წერილში სტრასბურგის სასამართლოს გადაწყვეტილებას აკრიტიკებს, რომლის მიხედვით საქართველოს უზენაესი სასამართლოს გადაწყვეტილებაზე „რუსთავი 2“-ის ქიბარ ხალვაშისთვის გადაცემაზე შეჩერების მექნიაზმი აამოქმედდა. გოცირიძის თქმით, ევროპული სასამართლოს გადაწყვეტილება სპეკულაციებს ემყარება და „იმედს გაუცრუებს ქართულ საზოგადოებას სამართლიანობის აღდგენისადმი მის მისწრაფებაში“.

ანა მებურიშვილი