სამართალი

ევა გოცირიძე საკონსტიტუციო სასამართლოს მოსამართლეობის კანდიდატად დასახელდა

იუსტიციის უმაღლესი საბჭოს წევრი ევა გოცირიძე, საკონსტიტუციო სასამართლოს მოსამართლეობის კანდიდატად დასახელდა.

გოცირიძე საპარლამენტო უმრავლესობაში შემავალმა ფრაქციებმა ბიუროს სხდომაზე ოფიციალურად წარადგინეს.

დამტკიცების შემთხვევაში, ევა გოცირიძე ლალი ფაფიაშვილს ჩაანაცვლებს, რომელსაც საკონსტიტუციო სასამართლოში უფლებამოსილების ვადა ეწურება.

საპარლამენტო უმრავლესობის წევრის მამუკა მდინარაძის თქმით, ევა გოცირიძესთან დაკავშირებული კითხვები „ნაციონალური მოძრაობის“ ანტიპიარს უკავშირდება, თუმცა ევა გოცირიძე პროფესიონალი იურისტია.

„კითხვები გამოწვეული იყო „ნაციონალური მოძრაობის“ ანტიპიარის შედეგად და დახასიათდა ქალბატონი ევა, რომ ის არის ობიექტური, პროფესიონალი იურისტი, პროფესიულ წრეებშიც ასე იცნობენ და ჩათვალა გუნდმა, რომ იგი გაართმევს ძალიან კარგად მოვალეობას თავს“,- აღნიშნა მამუკა მდინარაძემ.

თუმცა, არასამთავრობო ორგანიზაციის წევრებისთვის ევა გოცირიძის დანიშვნა მიუღებელია.

როგორც „საერთაშორისო გამჭვირვალობა - საქართველოს” იურისტმა ოლიკო შერმადინმა განაცხადა, მნიშნელოვანია, რომ საკონსტიტუციო სასამართლოში ისეთი პირი დაინიშნოს, რომელიც ნეიტრალური და პრინციპული იქნება. მისივე თქმით, ევა გოცირიძის საქმიანობიდან გამომდინარე კი, არ შეიძლება ითქვას, რომ მან პრინციპულობა გამოავლინა.

„ძალიან მნიშვნელოვანია საკონსტიტუციო სასამართლოში დაინიშნოს ისეთი პირი, რომელიც იქნება ნეიტრალური, პრინციპული. ჩვენ ევა გოცირიძის საქმიანობიდან გამომდინარე, შეგვიძლია ვთქვათ, რომ იუსტიციის უმაღლეს საბჭოში მისი საქმიანობის მეორე პერიოდში, მან ვერ გამოავლინა ეს პრინციპულობა. განსაკუთრებით მოსამართლეთა დანიშვნის ეტაპზე, რამაც სასამართლო სისტემა კრიზისში შეიყვანა. ასევე, ჩვენ გვახსოვს ევა გოცირიძის საკმაოდ საშიში ინიციატივა, გამოხატვის თავისუფლების შეზღუდვასთან დაკავშირებით,“ - განაცხადა შერმადინმა.

მონიკა დავლიანიძე