პოლიტიკა

ეუთო-ს გენმდივნის ვიზიტის და მისი განცხადებების შედეგად შთაბეჭდილება რჩება, რომ ამ ადამიანს არ ესმის ქვეყანაში შექმნილი მდგომარეობის სიმძიმე არამხოლოდ საქართველოსთვის, არამედ საერთაშორისო საზოგადოებისთვის - ირაკლი ფავლენიშვილი

ამ ვიზიტის და მისი განცხადებების შედეგად, რა თქმა უნდა, რჩება შთაბეჭდილება, რომ ამ ადამიანს არ ესმის ქვეყანაში შექმნილი მდგომარეობის სიმძიმე არამხოლოდ საქართველოსთვის, არამედ საერთაშორისო საზოგადოებისთვის, - ასე აფასებს „ერთიანობა - ნაციონალური მოძრაობის“ გენერალური მდივნის მოადგილე ირაკლი ფავლენიშვილი, საქართველოში ეუთო-ს გენერალური მდივნის, ფერიდუნ სინირლიოღლუს ვიზიტსა და მის მიერ გაკეთებულ განცხადებას.

„მნიშვნელოვანია, რომ საერთაშორისო მეგობრები კარგად ხედავენ იმ საფრთხეს, რასაც წარმოადგენს ივანიშვილის რეჟიმი არა მხოლოდ საქართველოსთვის, არამედ ევროპული უსაფრთხოებისთვის, რადგან როცა ქვეყანაში დიქტატურა მყარდება და უფლებები იზღუდება, ყველა დასავლური თუ საერთაშორისო ინსტიტუციის წარმომადგენელი უნდა იყოს ადეკვატური, ეს, მათ შორის, მნიშვნელოვანი იქნება უსაფრთხოებისთვის და სტაბილურობისთვის მთელი მსოფლიოს მასშტაბით, იმიტომ, რომ დემოკრატიული სისტემების ავტოკრატიულისკენ ცვლილება აბსოლუტურად ყველასთვის გამოწვევაა.

ამ ვიზიტის და მისი განცხადებების შედეგად, რა თქმა უნდა, რჩება შთაბეჭდილება, რომ ამ ადამიანს არ ესმის ქვეყანაში შექმნილი მდგომარეობის სიმძიმე არამხოლოდ საქართველოსთვის, არამედ საერთაშორისო საზოგადოებისთვის. თუმცა, ფაქტია, რომ ივანიშვილის რეჟიმი ვერ აღწევს იმ ლეგიტიმაციას და იმ აღიარებას, რასაც ის ესწრაფოდა დასავლურ სამყაროში ასეთი იზოლირებული და სანქცირებული დე ფაქტო ხელისუფლება საქართველოს არასდროს ჰყოლია მისი უახლოესი ისტორიის მანძილზე.

ეუთო/ოდირის დასკვნაშიც ხაზგასმული იყო ის, რომელზედაც საუბრობდა ოპოზიცია, თუ არასამთავრობო სექტორი, თუმცა ჩვენ არ ვსაუბრობთ მხოლოდ არჩევნების ტოტალურ გაყალბებაზე, ჩვენ ვსაუბრობთ ქვეყანაზე, სადაც დასავლური კურსი შეიცვალა, ევროპული ინტეგრაცია შეჩერდა, ადამიანები აწამეს, არაადამიანურად მოეპყრნენ და ამის შემდგომ ერთი ადამიანის იდენტიფიცირება, დასჯა არ მომხდარა, გვყავს ათეულობით პოლიტიკური ტყვე. ასე რომ, როდესაც ვსაუბრობთ საქართველოში შექმნილ სიტუაციაზე, მხოლოდ საარჩევნო ფაქტორი არ არსებობს. იმისთვის, რომ კარგად აანალიზებდე ქვეყანაში შექმნილ სიტუაციას, უფრო კონკრეტულად უნდა აღვიქვამდე პროცესს და დასკვნების გასაკეთებლად საარჩევნო პროცესი არ არის აუცილებელი“, - განაცხადა ირაკლი ფავლენიშვილმა.

საქართველოს ვიზიტით ევროპის უსაფრთხოებისა და თანამშრომლობის ორგანიზაციის (ეუთო) გენერალური მდივანი, ფერიდუნ სინირლიოღლუ სტუმრობს.