სამართალი

ე.წ ციანიდის სასამართლო პროცესის საქმეზე ჟურნალისტები დაიკითხებიან

ე.წ ციანიდის საქმეზე მსჯავრდებულის დეკანოზის ადვოკატის მიხეილ რამიშვილის ინმფორმაციით, სასამართლო პროცესის აუდიოჩანაწერის მედიაში მოხვედრის საკითხზე, პროკურორები, ჟურნალისტები და სავარაუდოდ, საპატრიარქოს წარმომადგენლებიც დაიკითხებიან.

ამის შესახებ რამიშვილმა ჟურნალისტებს საგამოძიებო უწყების დატოვების შემდეგ განუცხადა.

მისი თქმით, პროკურატურაში განაცხადა, რომ ყველა კითხვას მხოლოდ მაგისტრი მოსამართლის თანდასწრებით გასცემს.

მისიცვე თქმით, საგამოძიებო უწყებაში ძირითადად აინტერესებდათ, როგორ მოხდა აუდიო ჩანაწერი მედიასაშუალებების ხელში.

„კითხვები ეხებოდა შემდეგს: რამდენად მქონდა შეხება გასაჯაროებულ ინფორმაციასთან, ანუ ჩვენებებთან. მე ძალიან კონკრეტულად და ძალიან მოკლედ ვუთხარი, რომ ყველა ამ შეკითხვებზე პასუხს გავცემ მაგისტრი მოსამართლის თანამონაწილეობით. კითხვების არეალი არის შემდეგი - ვის შეეძლო ეს ინფორმაცია მიეწოდებინა ტელევიზიებისთვის, ვისი დახმარებით, ვინ შეიძლებოდა ყოფილიყო ამის წყარო.

რაც მეტი ადამიანი იქნება ჩართული იმაში რომ ჭეშმარიტება და ობიექტურობა დადგინდეს და კითხვის ნიშნები არ გაჩნდეს, იქნება კარგი.

როგორც ვიცი, მიმდინარეობს ყველა პირის დაკითხვა. კითხვაზე პასუხი მივიღე, რომ ყველა დაიკითხება, როგორც პროკურორები, ასევე ჟურნალისტები და ალბათ, საპატრიარქოს წარმომადგენლებიც. ყველა ადვოკატს ერთი მოთხოვნა გვაქვს, რომ ყველაფერი მოხდეს მაგისტრი მოსამართლის თანამონაწილეობით“,-განაცხადა რამიშვილმა.

მთავარმა პროკურატურამ გამოძიება, სავარაუდოდ, ტელეკომპანია რუსთავი2-ისა და „ტვ პირველის“ ეთერში გასულ აუდიოჩანაწერზე დაიწყო, რომელიც ე.წ ციანიდის საქმის დახურულ პროცესზე ჩვენებების მიცემას შეეხება, მათ შორის შორენა თეთრუაშვილის ჩვენებას.

მონიკა დავლიანიძე