სამართალი

ე.წ. ციანიდის საქმის პროკურორი არ ამბობს, თუ ვისი მკვლელობის მომზადება ედება ბრალად დეკანოზ გიორგი მამალაძეს

ე.წ. ციანიდის საქმის პროკურორი არჩილ ტყეშელაშვილი გამოძიების ინტერესებიდან გამომდინარე ამ ეტაპისთვის არ ამბობს, თუ ვისი მკვლელობის მომზადება ედება ბრალად დეკანოზ გიორგი მამალაძეს.

როგორც პროკურორმა ე.წ. მატროსოვის ციხეში ბრალდებულთან შესვლამდე ჟურნალისტებთან საუბრისას დაადასტურა, რომ საქმეზე დასაკითხ პირთა სიაში პატრიარქის მდივან-რეფერენტი, შორენა თეთრუაშვილიც არის.

”როგორც მთავარი პროკურატურის მიერ გაკეთდა განმარტებები, ამ ეტაპზე გამოძიების ინტერესებიდან გამომდინარე დეტალებზე ვერ ვისაუბრებ. თქვენ შეგიძლიათ იხელმძღვანელოთ იმ მასალებით და განმარტებებით, რომლებიც გააკეთა პროკურატურამ”, - განაცხადა პროკურორმა.

მისი თქმით, გარკვეულ დეტალებზე ღიად საუბარმა შესაძლოა გამოძიების ინტერესები დააზიანოს.

”როდესაც ასეთი საფრთხე აღარ იქნება, ეს მტკიცებულებები გახდება საჯარო საზოგადოებისთვის. თუ როდის მოხდება ეს, ამის წინასწარ პროგნოზის გაკეთება შეუძლებელია. კიდევ ერთხელ ვიმეორებ, როგორც კი აღარ იქნება აღნიშნული საფრთხე, მაღალი საზოგადოებრივი ინტერესებიდან გამომდინარე, ეს მტკიცებულებები გასაჯაროვდება”, - განაცხადა ტყეშელაშვილმა.

მისივე თქმით, საქმეში არსებული ყველა მტკიცებულება მოპოვებულია კანონის სრული დაცვით.

ტყეშელაშვილმა კომენტარი გააკეთა გაუთქმელობის პირობაზეც, რომელიც მამა გიორგის ადვოკატებს აქვთ დადებული და აღნიშნა, რომ მათ აქვთ კანონით დადგენილი ნებისმიერი საპროცესო ნორმის განხორციელების საშუალება, გაუთქმელობის პირობა კი გამოძიების ინტერესებიდან გამომდინარე და უსაფრთხოების მიზნით დაწესდა.

ნინო ექვთიმიშვილი