სამართალი

ე.წ ციანიდის საქმის მომდევნო პროცესიც დახურული იქნება

ე.წ ციანიდის საქმის მომდევნო სასამართლო პროცესიც დახურული იქნება.

თბილისის საქალაქო სასამართლოს მოსამართლემ, ბესიკ ბუგიანიშვილმა, ბრალდებულის ადვოკატების შუამდგომლობა არ დააკმაყოფილა პროცესის გასაჯაროებასთან დაკავშირებით.

დაცვის მხარე ეყრდნობა, მთავარი პროკურორის მიერ სატელევიზიო ეთერით გაკეთებულ განცხადებას, რომ საქმეში დეკანოზის პირადი ცხოვრების ამსახველი მასალა არ დევს.

„ვთქვი, პირდაპირ პროცესზე, რომ მათ მიერ დაყენებული შუამდგომლობა, რის საფუძველზეც დაიხურა სხდომა, მათ მიერვე იქნა უარყოფილი. აქედან გამომდინარე, მოსამართლე ვალდებული იყო ეხელმძღვანელა ამ გარემოებით“,-აღნიშნა გიოგრი მამალძის ადვოკატმა გიროგი ფანცულაიამ.

პროკურორის განმარტებით კი, საქმეში ნამდვილად არ არსებობს დეკანოზის პირადი ცხოვრების ამსახველი კადრები, მაგრამ, აღნიშნავს, რომ ვიდეო ჩანაწერებში დეკანოზი უარყოფით კონტექსტში, სხვადასხვა ადამიანის პირად ცხოვრებას ახსენებს.

„სისხლის სამართლის საქმეში არ არსებობს ვიდეო კადრები, სადაც ასახული არის კონკრეტული პიროვნების პირადი ცხოვრების ამსახველი დეტალი. ეს არის ვიდეო ჩანაწერები, სადაც ასახული არის გიორგი მამალაძის და ირაკლი მამალაძის შეხვედრები და საუბარი. ამ ვიდეო ჩანაწერებში გიორგი მამალაძე განიხილავს სხვადასხვა პირების პირად ცხოვრებას უარყოფით და მიუღებელ კონტექსტში“,-განაცხადა პროკურორმა.

მონიკა დავლიანიძე