პოლიტიკა

ე.წ. მოსმების კანონთან დაკავშირებით პრეზიდენტის ადმინისტრაციასთან კონსულტაციებზე უმრავლესობამ უარი თქვა - ფიქრია ჩიხრაძე

ე.წ. მოსმების კანონთან დაკავშირებით, სამწუხაროდ, გუშინ გვიან ღამით უმრავლესობამ უარი თქვა კონსულტაციებზე, - განუცხადა ჟურნალისტებს პოლიტიკურ საკითხებში პრეზიდენტის მრჩეველმა ფიქრია ჩიხრაძემ.

მისი თქმით, პროექტში ბევრი პრობლემაა, ამიტომ კონსულტაციების გამართვა მნიშვნელოვანი იყო.

„ამ პროექტში ბევრი პრობლემა კიდევ არის ჩარჩენილი. ჩვენ გვქონდა სხადასხვა მიმართულებით, სხვადასხვა სფეროს წარმომადგენლებთან კონსულტაციები ამ საკითხზე და გადავწყვიტეთ, რომ პირველ მოსმენამდე, ვიდრე პლენარულ სხდომაზე დაიწყება საკითხის განხილვა, გაგვემართა კონსულტაციები ფრაქციებთან და მიგვეწოდებინა მათთვის შესაბამისი მოსაზრებები. ოპოზიციურ ფრაქციებთან შეთანხმება მიღწეულია და დანიშნულია ეს შეხვედრები. რაც შეეხება უმრავლესობის ფრაქციებს, სამწუხაროდ, გუშინ გვინ ღამით უარი თქვეს კონსულტაციებზე. მიზეზი არ ვიცი. არის ხოლმე პრეტენზია, თითქოს წინასწარ არ ვეუბნებით, რომ შენიშვნები გვაქვს. როდესაც ვიწყებთ წინასწარ ამ საუბარს, გვეუბნებიან, რომ თურმე არ არის საჭირო ეს კონსულტაციები და ინფორმაციის გაცვლა,“ - განაცხადა ფიქრია ჩიხრაძემ.

ნინო ექვთიმიშვილი