სამართალი

ე.წ. კანონიერი ქურდები ფულს skype-ით სძალავდნენ

ბათუმის საქალაქო სასამართლომ ქურდული სამყაროს წევრობისთვის რუსლან ჩიქოვანს 6 წლით თავისუფლების აღკვეთა მიუსაჯა. რაც შეეხება კაკო ტუღუშს, მას სასამართლომ განაჩენი დაუსწრებლად გამოუტანა და 8 წლიანი პატიმრობა განუსაზღვრა.

სასამართლომ სრულად გაიზიარა პროკურატურის მიერ წარდგენილი მტკიცებულებები.

საქმეში მთავარი მტკიცებულება Skype-ის ჩანაწერები იყო, რითაც პროკურატურა ამტკიცებდა, რომ მსჯავრდებულები ბათუმში მცხოვრები ორი ბიზნესმენისგან დაახლოებით 300 ათასი ლარის გამოძალვას ცდილობდნენ.

სასამართლო სხდომაზე რუსლან ჩიქოვანმა ჩვენების მიცემის დროს მოსამართლეს უთხრა, რომ ის ქურდული სამყაროს წევრი არ არის, თუმცა დაადასტურა, რომ მისთვის მანამდე უცნობი ქართველი და თურქი ბიზნესმენი ერთმანეთს თვითონ შეახვედრა.

„აღნიშნული პირები მხოლოდ იმიტომ შევახვედრე, რომ დაპირისპირება და ჩხუბი არ მომხდარიყო. მე მათ საუბარში საერთოდ არ ჩავრეულვარ“, - განაცხადა პროცესზე რუსლან ჩიქოვანმა.

ნინო ექვთიმიშვილი