პოლიტიკა

ე.წ. „ფარული მოსმენების“ სააგენტოს წარმომადგენელთა პასუხებიდან ჩანს, რომ ეს ორგანო დამოუკიდებელი არაა - მიხეილ შარაშიძე

სახალხო დამცველის წარმომადგენლის, მიხეილ შარაშიძის განცხადებით, საკონსტიტუციო სასამართლოს სხდომაზე გამოიკვეთა, რომ ტექნიკურ-ოპერატიული სააგენტო ექვემდებარება სახელმწიფოებრივ კონტროლს.

შარაშიძემ აღნიშნა, რომ საკონსტიტუციო სასამართლოს 2016 წლის 14 აპრილის გადაწყვეტილებით, ე.წ. „ფარული მოსმენების“ ორგანო სრულიად დამოუკიდებელი უნდა ყოფილიყო.

„2016 წლის 14 აპრილის გადაწყვეტილება ცალსახად მიუთითებს, რომ ამ კომპეტენციით აღჭურვილი ორგანო უნდა ყოფილიყო აბსოლუტურად დამოუკიდებელი. რამდენად არის ის დამოუკიდებელი უსაფრთხოების სამსახურისგან? ჩვენ მიგვაჩნია, რომ ის საკმარისი დამოუკიდებლობით არ სარგებლობს და თუ მოვუსმენთ ამ სააგენტოს წარმომადგენლის პასუხებს, ცალსახად გამოიკვეთა, რომ არათუ არ არის დამოუკიდებელი, არამედ იგი საკმაოდ სერიოზული ზეგავლენის ქვეშაა. ის სახელმწიფოებრივ კონტროლს ექვემდებარება“, -განაცხადა შარაშიძემ.

ანა მებურიშვილი