პოლიტიკა

ე.წ. ფარული მოსმენების კანონის დაჩქარებული წესით განხილვა საკონსტიტუციო სასამართლოს გადაწყვეტილებითაა განპირობებული - გიორგი კახიანი

პარლამენტის იურიდიული კომიტეტის თავმჯდომარის, ეკა ბესელიას განცხადებით, ე.წ. ფარული მოსმენების კანონის მესამე მოსმენისას ძირითადად რედაქციული სახის შენიშვნები იქნება განხილული.

ბესელია არ გამორიცხავს კანონში ცვლილებების შეტანას.

„ კომიტეტი [იურიდიულ საკითხთა კომიტეტი] უკვე ემზადება საბოლოო მოსმენისთვის. ესაა ძირითადად, რედაქციული სახის შენიშვნები, ამავე დროს ის მოსაზრება, რომელიც მეორე მოსმენის დროს გამოითქვა, შენიშვნების სახით აისახება დოკუმენტში, შეიცვლება ჩანაწერი, სააგენტოს უფროსი თავად დანიშნავს მოიადგილეებსა და პირველ მოადგილეს“, - განაცხადა ბესელიამ.

პარლამენტის საპროცედურო საკითხთა და წესების კომიტეტის თვმჯდომარის, გიორგი კახიანის თქმით, კანონის დაჩქარებულ ვადებში განხილვა საკონსტიტუციო სასამართლოს გადაწყვეტილებითაა განპირობებული.

„გარკვეულ ვადებში ვართ მოქცეული საკონსტიტუციო სასამართლოს გადაწყვეტილებიდან გამომდინარე, იმიტომ რომ სასამართლომ თქვა, რომ შესაბამისი კანონმდებლობა ფარულ მოსმენებთან დაკავშირებით უნდა იყოს მიღებული 1-ლ აპრილამდე. აქედან გამომდინარე, ჩვენ მიზანშეწონილად მივიჩნიეთ, მესამე მოსმენით ამ საკითხის რიგგარეშე სხდომაზე განხილვა“, - განაცხადა კახიანმა.

შეგახსენებთ, რომ გუშინდელი საპარლამენტო ბიუროს სხდომაზე მიღებული გადაწყვეტილებით, ფარული საგამოძიებო მოქმედებების შესახებ ინიცირებული პროექტის მესამე მოსმენა რიგგარეშე სესიაზე პირველ მარტს გაიმართება, სადაც კანონპროექტის ტექნიკური საკითხები შესწორდება.

ანა მებურიშვილი