პოლიტიკა

„ეთიკის პრინციპების“ დოკუმენტს უკვე 20-მდე საპრეზიდენტო კანდიდატმა მოაწერა ხელი - თამარ ჟვანია

ცენტრალური საარჩევნო კომისიის თავმჯდომარის, თამარ ჟვანიას განცხადებით, პრეზიდენტობის კანდიდატების „ეთიკის პრინციპების“ დოკუმენტს ამ ეტაპზე 20-მდე კანდიდატმა მოაწერა ხელი.

ცესკოს თავმჯდომარის განმარტებით, „ეთიკის პრინციპებზე“ ყველა კანდიდატი თანხმდება და შესაბამისად, მას აქვს მოლოდინი, რომ დოკუმენტს ყველა კანდიდატი ხელს ერთი კვირის ვადაში მოაწერს.

„პრეზიდენტობის თითოეული კანდიდატი თუ წარმომადგენელი ჩართული იყო ეთიკის პრინციპების შემუშავების პროცესში და ისინი აცხადებენ თანხმობას ამ დოკუმენტზე შემოერთების. ამ ეტაპზე პროცესი ღიაა, მიმდინარეობს და გრძელდება ხელმოწერების პროცესი. უკვე 20-მდე კანდიდატმა მოაწერა ხელი და კიდევ ველოდებით დარჩენილი კანდიდატების მიერ დოკუმენტზე ხელმოწერას, ვინაიდან, ჩვენ წინასწარი თანხმობა და მხარდაჭერა დოკუმენტის შინაარსთან და შეთანხმების შედეგთან დაკავშირებით გვაქვს. ეს დოკუმენტი მნიშვნელოვანია, ვინაიდან საარჩევნო კულტურის განვითარება, სარჩევნო პროცესების ხელშეწყობა ჩვენი ქვეყნის დღის წესრიგის მნიშვნელოვანი ნაწილია. „ეთიკის პრინციპები“, რომელიც გახლავთ: საზოგადოების ინტერესების დაცვა, ძალადობაზე უარის თქმა, მუქარის, შანტაჟისა და სიძულვილის ენის გამოუყენებლობა, ცხადია, ეს არის ჩვენთვის მნიშვნელოვანი და ეს უპირველეს ყოვლისა, ჩვენი ქვეყნისა და ამომრჩევლის პატივისცემაა, როდესაც კანდიდატები ეთიკის პრინციპებით განახორციელებენ კამპანიას“, - განაცხადა ჟვანიამ.

რაც შეეხება კანდიდატების მიერ „ეთიკის პრინციპების“ დაცვას, ცესკოს თავმჯდომარის თქმით, „საზოგადოებამ თავად უნდა შეაფასონ, რამდენად იცავს ესა თუ ის კანდიდატი „ეთიკის პრინციპებს“ “.