მსოფლიო

ესპანეთის მთავრობამ კატალონიის ავტონომია გააუქმა

ესპანეთის მთავრობამ კატალონიის ავტონომიის გაუქმების გადაწყვეტილება მიიღო. ამის შესახებ იუწყება El Pais.

მთავრობამ აამოქმედა ესპანეთის კონსტიტუციის 155-ე მუხლი, რომელიც აუქმებს კატალონიის ავტონომიას. რეგიონი მადრიდის კონტროლის ქვეშ იქნება.

მინისტრთა კაბინეტის 2-საათიანი სხდომის შემდეგ ესპანეთის პრემიერ-მინისტრმა მარიანო რეხოიმ თქვა, რომ ავტომატურად გაუქმდება კარლეს პუიჩდემონის უფლებამოსილება, დათხოვნილი იქნება კატალონიის პარლამენტი.

რეხოის თქმით, არჩევნები კატალონიაში მომდევნო 6 თვის განმავლობაში ჩატარდება.

„ჩემი სურვილია, არჩევნები გამოვაცხადო მაშინვე, როგორც კი ნორმალური სიტუაცია აღდგება“, - თქვა ქვეყნის პრემიერმა.

ეს პირველი შემთხვევაა 1978 წლის კონსტიტუციის მიღების შემდეგ, როცა ესპანეთის მთავრობა ასეთ რადიკალურ ზომებზე წავიდა.

კატალონიის ავტონომიის გაუქმების გადაწყვეტილება ამოქმედდება მაშინ, თუკი შემდეგ კვირას მას მხარს დაუჭერს ესპანეთის სენატი.

ვითარება დედაქალაქსა და ავტონომიას შორის დაიძაბა 1-ელი ოქტომბრის რეფერენდუმის შემდეგ. მაშინ კატალონიაში ხმის მისაცემად საარჩევნო უბნებში დარეგისტრირებულ ამომრჩეველთა 42.3% გამოცხადდა, რომელთა 90%-მა მხარი დაუჭირა რეგიონის დამოუკიდებლობას.

ანა მებურიშვილი