პოლიტიკა

ესაა კონსესუსის მიღწევის ბოლო მცდელობა - გიორგი აბაშიშვილი

საქართველოს პრეზიდენტის ადმინისტრაციის ხელმძღვანელის, გიორგი აბაშიშვილის განცხადებით, დღეს პრეზიდენტსა და ოპოზიციას შორის დაგეგმილ დახურულ შეხვედრაზე საკონსტიტუციო ცვლილებებზე კონსესუსის მიღწევის ყველა ვარიანტს განიხილავენ.

აბაშიშვილმა მმართველი გუნდი გააფრთხილა, რომ ესაა შეთანხმების მიღწევის ბოლო შესაძლებლობა.

„დღეს პოლიტიკურ პარტიებთან შეხვედრაზე განვიხილავთ კონსენსუსის ყველა შესაძლებლობას, რომელიც შეიძლება თან ახლდეს კონსტიტუციის მიღებას. თავისთავად, პრეზიდენტის მიერ მიღებულ ინიციატივაში კონსენსუსი უკვე დაშვებულია, როცა ჩვენ ვსაუბრობთ, რომ მეორე მოსმენით მიღებულ კანონს დავუმატოთ ძირითადი შეთანხმებული საკითხები. სწორედ ამ შეთანხმების შესაძლებლობებზე ვიმსჯელებთ პოლიტიკურ პარტიებთან, რათა საბოლოოდ ჩამოყალიბდეს ერთიანი პოზიცია და არ მოხდეს ისე, რომ კონსტიტუცია მიღებული იყოს მხოლოდ ერთი პარტიის გადაწყვეტილებით.

ეს არის ბოლო შესაძლებლობა, ბოლო მცდელობა და ბოლო შეთავაზება მმართველი გუნდისთვის, რომ ნამდვილად არსებობს კონსენსუსის რესურსი. მთავარია ეს შესაძლებლობა იქნას გამოყენებული, რათა არ დაზარალდეს ქვეყნის იმიჯი საერთაშორისო ასპარეზზე და არ გაჩნდეს სერიოზული კითხვები ქვეყნის დემოკრატიულ განვითარებასთან დაკავშირებით“, -თქვა პრეზიდენტის ადმინისტრაციის უფროსმა.

ანა მებურიშვილი